Despois de 4 anos de negociacións infrutuosas do Convenio e de non recoñecer o fondo existente de 1.700.000 € para a constitución do Plan de Pensións, o 29 de maio CCOO concentrámonos na sede de Paradores en Madrid para reivindicar un cambio de actitude por parte da Hoteleira Pública. Ler máis

Trala convocatoria de folga convocada para os días 16, 17, 18 e 19 de abril pola Federación de Servizos de CCOO en Galicia e UGT, o 18 de abril levouse a cabo unha rolda de prensa onde se denunciou publicamente o bloqueo por parte da patronal do convenio de Oficinas e Despachos.

Na devandita rolda de prensa tamén se denunciou por parte da Federación de Servizos a intención de seguir precarizando un sector altamente cualificado, con salarios cuxas táboas non alcanzarían nin sequera o Salario Mínimo Interprofesional, segundo as intencións da patronal.

Pola tarde tivo lugar unha concentración diante da sede da CEP de Pontevedra en Vigo, con numerosas persoas persoas traballadoras do sector a reivindicar a non eliminación do plus de antigüidade e o dereito a unhas condicións e salarios dignos.

A patronal manifestou a súa liña vermella de eliminar a antigüidade na última reunión da mesa negociadora do convenio de oficinas e despachos da provincia de Pontevedra do pasado 19 de marzo, á cal nos opoñemos frontalmente a parte social. Por este motivo nos emprazamos ao 12 de abril para tentar desbloquear a situación. Porén, onte á tarde comunicóusenos a anulación da xuntanza prevista para hoxe.

É por iso que, dacordo tamén ás asembleas de traballadores/as levadas a cabo, UGT e CCOO convocamos unha folga na provincia de Pontevedra de 4 días, dende o 16 ata o 19 de abril, na que ti poderás escoller o día que queres facer folga sen necesidade de preavisar a ninguén. Ditas folgas convócanse en protesta respecto ao intento da patronal de seguir precarizando as condicións económicas e laborais do sector de Oficinas e Despachos de Pontevedra. As persoas traballadoras do sector non son persoal de segunda e merecen condicións laborais similares ás doutras provincias.

Así mesmo, convocamos unha concentración o día 18 de abril as 19:30 horas diante da sede da CEP Pontevedra. Esperámosvos a todos/as, é o momento de dicir BASTA XA!!!

CCOO, sindicato maioritario en Inditex, impulsou a mobilización do seu activo sindical fronte ás tendas de Inditex en 8 cidades e a da plantilla a través dunha recollida de firmas subscrita por máis da metade das 27.176 persoas traballadoras nas tendas, para esixir a Inditex avances reais nas negociacións a nivel estatal, para mellorar de forma xusta e equitativa as condicións laborais no conxunto de marcas e territorios, tras os beneficios récord obtidos. Inditex, atendendo esta campaña de mobilización de CCOO, convocou Mesa estatal o 3 de abril.

O Grupo Inditex declarou uns beneficios de 5.381 millóns, cun incremento do 30% respecto ao exercicio anterior. Na súa actividade en España, superou os 1.600 millóns de beneficios e os 5.665 millóns en vendas, o que supón 200.000 euros en vendas por persoa empregada en tendas. Con todo, estes beneficios non están revertendo na plantilla en forma de mellora global, en todas as marcas e territorios, das súas condicións laborais, ao non haber avances reais nas negociacións estatais.

Ante esta situación, máis de 500 delegadas e delegados de CCOO mobilizáronse en Madrid, Barcelona, Sevilla, Málaga, Valencia, Bilbao, Las Palmas e Vigo. Ademais, o sindicato recolleu en tan só 7 días 13.843 firmas, desde o 15 ao 21 de marzo: É dicir, o 50,94% da plantilla do Grupo Inditex asinou para apoiar a campaña de CCOO e que os beneficios do Grupo revertan de forma xusta e equitativa, en quen os fan posible: en todas as persoas traballadoras de todas as cadeas de toda España, con avances reais e globais nas Mesas estatais, homologando condicións ao alza.

Atendendo á reclamación de CCOO de establecer marcos de negociación onde se defendan os intereses de todas as plantillas do Grupo Inditex en todos os territorios, o Grupo Inditex dirixiuse a CCOO, como sindicato maioritario, anunciándolle convocatoria de Mesa estatal o próximo 3 de abril.

O 19 de marzo celebrouse a última reunión da mesa negociadora do convenio de oficinas e despachos da provincia de Pontevedra. Unha vez máis a patronal veu dicir que a súa liña vermella é a eliminación da antigüidade e que non se podería avanzar na negociación mentres a parte social non estea disposta a eliminala.

Desde CCOO fomos moi claros desde o inicio da negociación do convenio:

A ANTIGÜIDADE NON SE TOCA!

Existen moitos puntos deste convenio que se deberían abordar, polo que a decisión da patronal de non seguir avanzando na negociación é incomprensible. Algúns esquecen que desde o ano 2012 este convenio leva coas táboas salariais conxeladas e pendente de actualizarse en materia de permisos, igualdade, contratación e demais novidades lexislativas que no convenio quedaron obsoletas.

CCOO anunciámoslles na mesa que iniciaremos mobilizacións progresivas no sector, para esixir un convenio colectivo á altura dos cadros de persoal e que non estamos dispostos a que exista discriminación de salarios en comparación con outros convenios do sector de Oficinas e Despachos existentes en Galicia.

PONTEVICUS pretende agora que se inclúa o mes de maio como mes de vacacións de verán de forma unilateral e incumprindo todos os acordos e compromisos.

Tanto o convenio colectivo como os acordos de empresa indican cales son os meses de verán, e dende hai máis de 20 anos, maio non está entre eles. Para protestar por esta situación:

• Concentrámonos hoxe diante do GADIS de Rúa Barcelona en Vigo
• CCOO denunciamos esta situación e presentamos un conflito colectivo cuxo xuízo será mañá xoves 7 de marzo no TRIBUNAL SUPERIOR DE XUSTIZA DE GALICIA.

Mantédevos atentos/as a futuras actualizacións para máis detalles. CCOO non permitiremos que prexuízos ao persoal queden sen resposta.

O pasado 7 de febreiro mantivemos a última reunión da negociación do convenio de Oficinas e Despachos da Provincia de Pontevedra, onde tan só se presentaron dúas persoas por parte da patronal xa que supostamente, ao non recibir unha proposta por escrito pola parte social, consideraban que non era necesaria a reunión.

CCOO trasladamos que a proposta de táboas salariais presentada na última reunión pola patronal nos podería servir como punto de partida para o ano 2023, actualizando previamente todas as categorías que estivesen por baixo do SMI e establecendo unha diferenza de 80€ entre categorías. A partir de aí poderiamos empezar a negociar a suba salarial para os próximos anos, pero sen tocar en ningún momento a antigüidade. 

A sorpresa atopámola cando a CIG, sindicato que ten a maioría da representación SOCIAL na mesa, ofreceulle á patronal rebaixar a antigüidade a un 4% do salario base por trienio cun tope máximo do 40% (actualmente 5% por bienio cun tope do 60%). Para isto convocou no seu momento folga e mobilizacións, facéndolle perder diñeiro ao persoal?

O agasallo da CIG á patronal suporía unha perda económica e un enorme risco para os cadros de persoal no futuro. Lembremos que durante 12 anos non houbo interese por parte da patronal de negociar o convenio, e precisamente a antigüidade foi a que permitiu que os salarios subisen minimamente cada dous anos.

CCOO non está disposta a asinar un convenio que supoña unha perda de dereitos para o persoal do sector de Oficinas e Despachos da Provincia de Pontevedra.

O 26 de xaneiro de 2024 mantivemos unha nova xuntanza donde a patronal presentou unha proposta de suba salarial  dun 25% de actualización dos últimos 10 anos, acompañada da conxelación da antigüidade.

CCOO unha vez máis deixamos claro na mesa de negociación que non estamos dispostos/as a conxelar a antigüidade nin a aumentar o seu tope.

CCOO valoramos positivamente que por fin a patronal aporte unha proposta económica seria, sen embargo para CCOO a proposta da patronal ten que ser o punto de partida da negociación dos incrementos dos próximos anos. Como vimos defendendo dende o inicio da negociación, a primeira fase debía pasar por actualizar previamente o IPC dos últimos 10 anos, revisando todas aquelas categorías que estean por debaixo do SMI e a partir de aí negociar a suba salarial.

A próxima reunión será o día 7 de febreiro, donde deixaremos claro que dende CCOO valoramos a proposta da patronal como un punto de partida para negociar os incrementos dos vindeiros anos, pero sen tocar a antigüidade.

O 15 de xaneiro de 2024 retomouse a negociación do Convenio de Oficinas e Despachos da provincia de Pontevedra producíndose un fenómeno denominado O DÍA DA MARMOTA! 

Una vez máis sentámonos a negociar e a patronal puxo enriba da mesa a conxelación da antigüidade sen traer unha proposta salarial seria.

CCOO unha vez máis deixamos claro na mesa de negociación que non estamos dispostos/as a conxelar a antigüidade e tampouco a día de hoxe aceptaríamos a proposta realizada pola CIG na mesa de modificar e aumentar o tope da antigüidade.

CCOO esiximos que a negociación debe pasar por actualizar previamente o IPC dos últimos 10 anos, revisando todas aquelas categorías que estean por debaixo do SMI e a partir de aí negociar a suba salarial.

A próxima reunión será o día 26 de xaneiro, donde esperamos que a patronal traia dunha vez por todas unha proposta seria que permita recuperar o poder adquisitivo perdido polo persoal do Convenio de Oficinas e Despachos de Pontevedra.