Tras cinco reunións da mesa negociadora o pasado 2 de maio, asinamos o Convenio de Comercio de Materiais de Construción e Saneamento da provincia de Pontevedra, o que terá unha vixencia de dous anos, 2018 e 2019.

O Sindicato Nacional de CCOO de Galicia e UGT-Galicia congratúlanse do «éxito» da folga convocada hoxe polo sindicalismo de clase. O seguimento dos paros de dúas horas foi masivo, especialmente en grandes empresas e administracións públicas. Polo de agora, non houbo incidentes salientables nin no paro que da madrugada (entre as 00:00 e as 02:00), nin tampouco ao mediodía (das 12:00 ás 14:00). 

Con motivo da folga convocada para o día 8 de marzo volvemos a ver que Fetico e Fasga continúan facendo o mesmo papel, seguidismo da patronal e das empresas, tentando desprestixiar unha mobilización histórica e necesaria.

Non imos perder nin un minuto en responder aos argumentos tan absurdos que utilizaron na reunión extraordinaria do Corte Inglés de Vigo, que se celebrou neste centro o día 22 de febreiro. Non recoñecen, e parece non preocuparlles moito, os problemas reais que sufrimos as mulleres, tamén nesta empresa. Imos explicarvos os motivos que nos levaron a convocar esta mobilización.

As CCOO estivemos sempre en primeira liña na loita polos dereitos das mulleres e pola igualdade. Quixemos protagonizar unha mobilización laboral sen precedentes na historia do movemento sindical e feminista en España.

Por que CCOO pode convocar unha folga xeral? Porque é a primeira organización sindical neste país e formamos parte de organizacións sindicais internacionais.

Sobran os motivos:

• Os contratos de semanas ou meses recaen maiormente nas mulleres, as cales están a traballar con xornadas con menos horas.

• As pensións son un 37% máis baixa para as mulleres.

• No 2017 foron asasinas 49 mulleres e 8 nenas e nenos por violencia machista.

• A brecha salarial segue aumentando en todos os sectores do noso país, en traballo de igual valor as mulleres cobran ata un 30% menos que os homes.

• Os coidados recaen maioritariamente sobre nós, e 9 de cada 10 permisos ou excedencias recaen sobre as mulleres.

• Cantas mulleres están a traballar nos departamentos de loxística? E na liña de caixas?

• E cantas de directoras de centros? Teñen o mesmo porcentaxe de presenza na empresa?

• Realmente cremos que a igualdade efectiva e real chegou por asinar un acordo ou non? queda moito camiño por andar.

Por todo isto cremos que unha folga de 2 horas por quenda de traballo é a forma máis eficaz para conseguir este obxectivo. Tamén, porque é a menos gravosa para o conxunto das persoas traballadoras, ao supor un menor prexuízo económico.

Todos os traballadores e traballadoras teñen dereito á folga, é un dereito recoñecido pola Constitución a todas as persoas traballadoras, e están cubertas pola convocatoria xeral. Por tanto, non hai que notificalo, nin preavisar a intención de secundar a folga. Doutra banda, a empresa tampouco debería preguntar aos seus traballadores e traballadoras se acudirán a traballar ou non, xa que podería considerarse un intento de coacción, algo perseguido pola lei.

Ao tratarse dunha folga ou paro de 2 horas, o desconto salarial será de dúas horas incluíndo a parte proporcional das pagas extraordinarias.

A Federación de Servizos de CCOO de Galicia informa da suspensión da folga prevista para hoxe e mañá no Lefties do Centro Comercial Gran Vía de Vigo, coa que se pretendía lograr a readmisión dun compañeiro. Tras unha «intensa» negociación, os sindicatos CCOO, CIG e UGT conseguiron na tarde do xoves que a empresa readmita o traballador despedido noutra das tendas do grupo (a da rúa Progreso), pero conservando as mesmas condicións laborais. Este acordo determina a desconvocatoria da folga. O vindeiro martes, día 27, haberá unha reunión para pechar os flocos económicos da readmisión.

CCOO, que ten a maioría no comité de empresa, congratúlase polo acordo acadado. O sindicato salienta a unidade de acción sindical, que contribuíu a que este conflito se resolvera positivamente para o traballador afectado. «Neste conflito puxemos en valor a solidariedade das persoas coa situación inxusta que padeceu un compañeiro», insisten desde Comisións.

Antecedentes

CCOO e o resto dos sindicatos afirmaron en todo momento que consideraban «inxusto e arbitrario» o despedimento dun traballador do Lefties de Gran Vía, que tiña a responsabilidade de segundo encargado e contaba, ademais, co apoio dos seus compañeiros e compañeiras.

Como reacción, o comité de empresa xa convocara concentracións os pasados días 12, 13 e 14 para pedir a readmisión. Ao non haber unha resposta «satisfactoria» á reivindicación, decidiuse convocar a folga, agora xa sen efecto grazas ao acordo.

Tras as concentracións realizadas os pasados días 12, 13 e 14 de febreiro contra o despedimento de un traballador do Lefties do Centro Comercial Gran Vía de Vigo, e non tendo unha resposta satisfactoria por parte da dirección da empresa, o comité de empresa decidiu convocar unha folga para este centro de traballo os próximos venres 23 e sábado 24.

Para CCOO, trátase dun despedimento «inxusto e arbitrario» para o que se utilizaron argumentos «surrealistas» como que «estivo facendo unha postal de felicitación en tempo de traballo». Este traballador é o segundo encargado e conta co apio dos seus compañeiros e compañeiras, que non entenden os motivos que puideron levar a dirección da empresa a tomar unha decisión «tan drástica e inxusta».

O comité de empresa e o persoal de Lefties, que pertence ao grupo Inditex, instan a empresa que mude a decisión adoptada e readmita o compañeiro despedido.

+ Para máis información:

• Jorge Carneiro, da Federación de Servizos de CCOO: 660 106 961

O II Congreso da Federación de Servicios de CCOO determinou nos seus relatorios e Estatutos que o Consello Federal aprobaría durante o presente mandato a integración de Servizos Administrativos e Servizos Técnicos. Cabe salientar que a nova agrupación recolle os sectores de: Servizos Administrativos, Seguros e Mutuas de Accidentes de Traballo, Planificación e Consultorías (TIC), Contact Center, Enxeñerías e Inspección Técnica e Intermediación Laboral.

Esta nova estrutura presenta aínda máis diversidade tendo en conta os distintos sectores que recolle a nova agrupación, ademais de retos organizativos e de acción sindical máis amplos, tales como combatir a precariedade e dotarse de novas ferramentas ante o cambio tecnolóxico e a dixitalización no traballo.

A celebración deste Plenario de integración supón unha continuidade do proceso iniciado en 2014, así como unha importante ampliación do seu ámbito funcional e sectorial que dá lugar a unha nova realidade organizativa que require novos órganos de dirección. Neste caso, unha vez realizadas as votacións queda elixido como responsable da coordinadora da agrupación Héctor Ortega Sánchez.

O presente plenario debe servir para integrar, ilusionar, comprometer e construír un sector que integrará unha ampla gama de subsectores, con heteroxeneidade nas súas características e maior variedade dos seus modelos de negociación colectiva.