A patronal da hostalaría da provincia da Coruña, nun acto de total cobiza, pretende aumentar aínda máis os seus crecentes beneficios ? a costa de impoñer condicións laborais escravistas.

O que queren impor

• Quitar o complemento que temos agora nas baixas médicas
• O máximo beneficio a costa da túa conxelación salarial.
• Manter os continuos excesos de xornada sen pagar as horas extraordinarias.
• Nula posibilidade de conciliación da vida laboral e familiar pola falta de días de descanso.
  
  CONVOCÁMOSTE ÁS ASEMBLEAS INFORMATIVAS

Para analizar esta situación, convocámoste ás asembleas informativas que terán lugar o vindeiro luns, 14 de xullo, nos seguintes horarios e lugares:
 

Horarios:	Lugares:
11:30 – 12:30 18:00 – 19:00	A Coruña: Edif. Sindicatos – Salón de Actos Santiago: Edif. Sindical – Salón da UGT Ferrol: Edif. Sindicatos – Salón de Actos

 

 

 

 

 

 

 

 

 

 

Sorpréndenos a decisión unilateral da CIG de convocar mobilizacións, especialmente porque participaron activamente na mesa de negociación e nunca expresaron intención de mobilizarse.

Desde CCOO apostamos pola unidade, polo diálogo e por sumar forzas. Cústanos entender que outro sindicato actúe por libre, sen informar ao resto dos presentes na mesa. Esta actitude pon en risco un posible acordo que tiñamos opción de pechar antes de agosto.

Nós seguimos traballando arreo por un convenio que mellore de verdade as condicións laborais nun sector en auxe: con máis noites de estancia, máis visitantes e máis gasto medio.

Fixamos un límite claro ante a patronal: acordo antes de agosto!

E lembramos: a CIG tamén está nesta mesa.

Se non se consegue un pacto que beneficie a todas as persoas traballadoras da hostalería pontevedresa, CCOO poremos en marcha as nosas propias mobilizacións en agosto.

Seguiremos informando paso a paso. A vosa participación e a unidade son claves para acadar un convenio xusto e digno.

A Federación de Servizos de CCOO de Galicia acusamos á patronal da hostalaría de bloquear a negociación dos convenios colectivos e de desviar responsabilidades ao culpar as axudas públicas á contratación da suposta falta de persoal no sector.

Advertimos que non se atoparán traballadores e traballadoras mentres non se ofrezan salarios dignos, estabilidade laboral e condicións que permitan a conciliación da vida profesional e familiar.
 

“A raíz do problema está nas condicións laborais”

CCOO critica que as empresas eviten asumir responsabilidades e insistan en “botar balóns fóra” cando a verdadeira causa da escaseza de persoal reside nas precarias condicións laborais. “É difícil atraer profesionais se se pretende que agarden na casa por unha chamada para traballar só en momentos puntuais”, denuncian desde o sindicato.
 

A “cegueira empresarial” fronte á realidade do sector

A organización sindical considera unha auténtica “cegueira empresarial” culpar as axudas ás persoas desempregadas da falta de man de obra. Segundo CCOO, moitos profesionais abandonaron o sector hostaleiro buscando mellores oportunidades noutros ámbitos, ante a falta de condicións dignas.
 

Convenios colectivos bloqueados ás portas da campaña de verán

Con máis de 50.000 traballadores e traballadoras afectados en Galicia, os tres convenios colectivos da hostalaría seguen sen avances significativos, a pesar da proximidade da campaña de verán e da recente actividade durante a Semana Santa.
 

CCOO denunciamos que a actitude da patronal paraliza as mesas de negociación, malia as propostas sindicais que inclúen:

• Incrementos salariais acordes co custo de vida e os beneficios empresariais

• Xornadas laborais e descansos que permitan a conciliación

• Recoñecemento da formación profesional en escolas de hostalaría
   

A patronal responde cun “non” rotundo ás propostas sindicais

A resposta da patronal ás medidas propostas por CCOO foi un claro “non”, o que o sindicato cualifica de postura retrógrada. “Temos problemas actuais que esixen solucións do século XXI, pero a patronal segue aplicando receitas do pasado”, conclúen desde CCOO, lembrando que o aumento constante dos beneficios empresariais non se reflicte nas condicións do persoal.

Onte celebrouse a segunda reunión de negociación do Convenio da Hostalaría da Coruña 2025 no Consello Galego de Relacións Laborais.

Durante a sesión, presentouse a plataforma conxunta elaborada polos tres sindicatos da mesa negociadora. Porén, a resposta da patronal foi negativa, rexeitando todas as propostas e mantendo a súa postura habitual de inmobilismo.

Obxectivo: Mellorar Condicións Laborais e Salariais

Dende os sindicatos seguimos defendendo a necesidade de:
Subir os salarios na hostalaría da Coruña.
Mellorar as condicións de traballo no sector.
Facer da hostalaría un sector máis atractivo e sostible.

A pesar das diferenzas, avanzamos en varios puntos de carácter social, que se tratarán na próxima reunión o 28 de abril de 2025.

Seguiremos informando sobre os avances do convenio da hostalaría. Mantente ao día para coñecer todas as novidades!

Desde CCOO consensuamos una plataforma conxunta con UGT e CIG para negociar o novo Convenio Colectivo de Hostalaría da Coruña. O obxectivo principal é mellorar as condicións laborais do sector, aproveitando o seu crecemento e os beneficios acadados.

Principais materias a tratar:

• Ámbito funcional e vixencia do convenio.
• Condicións salariais:
  • Incremento do 5% anual en todos os conceptos.
  • Creación de novos pluses para persoal con funcións adicionais, idiomas ou estudos de ciclo medio ou superior.
• Xornada laboral:
  • Redución a 35 horas semanais (1685 horas anuais).
  • Descanso de 20 minutos dentro da xornada como tempo efectivo de traballo.
  • Dereito a un fin de semana libre ao mes.
  • Dous días de libranza semanais.
• Licenzas e excedencias: Adaptación á lexislación vixente.
• Plus de vestimenta: 15 euros/mes para limpeza e mantemento e 2 pares de calzado ao ano (ou 80 euros por calzado).
• Saúde laboral:
  • Procedementos anuais de control de riscos psicosociais.
  • Protocolos de comunicación e suspensión por embarazo.
  • Adaptacións de xornada por garda legal e coidado de familiares.
  • Protocolos contra o acoso e a discriminación LGTBI.
• Outras disposicións:
  • Festivos e día da patroa.
  • Contratación.
  • Enfermidade.
  • Xubilación.
  • Seguros.
  • Preaviso de cese.
  • Dereitos sindicais.
  • Roupa de traballo.
  • Desconexión dixital.
  • Igualdade.
  • Táboas salariais.

Este proceso de negociación busca recoñecer a profesionalización do sector e mellorar as condicións laborais dos traballadores e traballadoras da hostalaría na Coruña.

Onte, 6 de marzo de 2025, constituíuse a mesa negociadora do Convenio Colectivo de Hostalaría da Coruña, un paso clave para mellorar as condicións laborais do sector.

Na negociación participan as centrais sindicais CCOO, CIG e UGT, representando ás persoas traballadoras, e as principais organizacións patronais: Unión Hostaleira Compostela, Asociación Empresarial de Hospedaxe da Coruña, Asociación Provincial de Empresarios de Hostalaría de Ferrol, Asociación Provincial de Empresarios de Hostalaría da Coruña e a Asociación de Turismo e Hostalaría Compostela.
 

CCOO loita por condicións laborais dignas no sector da hostalaría

Desde CCOO Hostalaría A Coruña, traballaremos para que o novo convenio colectivo garanta melloras salariais, estabilidade laboral e condicións xustas para o persoal da hostalaría. O sector non pode seguir baseado en precariedade: salarios baixos, xornadas abusivas e falta de conciliación.

A patronal debe comprender que a falta de traballadores/as non se debe á falta de vontade, senón ás malas condicións laborais. A realidade é clara: o turismo e a hostalaría están en auxe tras a pandemia, con beneficios en constante crecemento. Agora é o momento de que este éxito se traduza en mellores condicións para as traballadoras e os traballadores.
 

A profesionalización da hostalaría, clave para o futuro do sector

Se queremos unha hostalaría galega profesional e atractiva, é imprescindible garantir salarios dignos, xornadas equilibradas e dereitos laborais respectados. O novo convenio é a oportunidade para transformar o sector e asegurar un futuro sostible para as persoas traballadoras e as empresas.

Síguenos para máis actualizacións sobre a negociación do Convenio de Hostalaría da Coruña. Comparte e fai que a túa voz se escoite!

O Tribunal Superior de Xustiza de Galicia (TSXG) ratificou unha sentenza que recoñece a incapacidade permanente absoluta para unha traballadora de 59 anos que padece fibromialxia, síndrome de fatiga crónica e múltiples síntomas severos. A defensa correu a cargo de Matilde Mallo Nieves, Graduada en Dereito e Graduada Social na asesoría xurídica na Unión Comarcal de CCOO Santiago-Barbanza.

A afectada, cociñeira de profesión, experimenta unha serie de síntomas graves e debilitantes, como dores en todas as articulacións, fatiga extrema, depresión maior crónica, dificultades de concentración, insomnio e perda severa de peso (26 quilos en cinco meses). En 2019, obtivo a baixa laboral e, dous anos despois, o INSS concedeulle unha incapacidade total que só cubría o 75% da súa base de cotización. Sen embargo, dado o avance dos seus síntomas, a traballadora decidiu loitar polo recoñecemento da incapacidade absoluta, que lle permite recibir o 100% da base reguladora.

O tribunal conclúe que os graves síntomas lle impiden desenvolver calquera traballo con eficacia, mesmo ocupacións non físicas. O TSXG entende que a incapacidade non se limita á imposibilidade de realizar un traballo concreto, senón que tamén inclúe aqueles casos nos que a persoa non pode levar unha vida laboral activa debido á gravidade da súa doenza.

A sentenza, ao ser firme, marca un importante precedente para o recoñecemento de enfermidades incapacitantes como a fibromialxia. A Graduada en Dereito, Matilde Mallo, sinala que este é un gran paso para visibilizar unha enfermidade que afecta a moitas persoas en condicións similares.

Desde CCOO Servizos queremos salientar a importancia desta sentenza, que supón un paso máis nun sector como o da hostalaría, no que se sofren múltiples doenzas músculo-esqueléticas debido ás longas xornadas de traballo de pé e en movemento, sen que estas cheguen a ser recoñecidas como enfermidades laborais.

CCOO Servizos trasladamos as nosas condolencias aos familiares, compañeiros/as e amizades da traballadora, que perdeu a vida nun accidente laboral nas instalacións do Hotel.

A Federación de Servizos de CCOO de Galicia sinalamos que a protección da seguridade das persoas e traballadoras é «unha das prioridades» nas relacións laborais nun estado de dereito. Por esta razón, «queremos lembrar a importancia e necesidade de reforzar nestas datas todas as medidas de Prevención de Riscos que permitan evitar situacións de tensión térmica que poidan derivar en situacións fatídicas».

Á espera de confirmar oficialmente as causas do falecemento da traballadora, CCOO alerta do incremento «xeneralizado» da sinistralidade laboral no noso país, razón pola cal o sindicato reivindica políticas públicas en saúde laboral e un maior control por parte da Administración sobre a aplicación das ferramentas de prevención de riscos laborais en todas as empresas. Insistimos na necesidade de colaboración entre os diferentes axentes involucrados na prevención para evitar que traballadores e traballadoras sigan perdendo a vida a causa de accidentes laborais e esiximos a pronta e exhaustiva investigación do falecemento e a depuración de responsabilidades se as houbese.

Onda de calor e traballo

CCOO Servizos volvemos reclamar, como o levamos facendo desde hai moitos anos, que se actúe ante as temperaturas extremas no entorno laboral, pois as persoas traballadoras son un colectivo vulnerable. Debe actuarse, non só cando hai ondas de calor, senón que hai que previlas e estar preparado todo o ano. Co cambio climático estes episodios son cada vez máis numerosos e frecuentes, mesmo fóra dos períodos estivais. De feito, no mes de abril de 2024 soportamos as primeiras temperaturas anormalmente elevadas, sen chegar a ser cualificadas como onda de calor.

Evitar a tensión térmica é unha obrigación para todas as empresas desde que existe a Lei de Prevención de Riscos Laborais. O Real Decreto de seguridade e saúde nos lugares de traballo, modificado o ano pasado, permite paralizar a actividade laboral ante unha alerta vermella ou laranxa para calquera risco relacionado con fenómenos meteorolóxicos adversos, incluídas as temperaturas extremas. Ampara a calquera persoa traballadora, especialmente ás que desenvolven a súa tarefa ao aire libre ou en lugares de traballo pechados non climatizados, se a aplicación de medidas preventivas non é suficiente para poder garantir a súa saúde.

Este ano existe unha novidade importante no Plan nacional de actuacións preventivas dos efectos do exceso de temperaturas sobre a saúde (Ano 2024), que desenvolve o Ministerio de Sanidade para evitar os danos á saúde de toda a poboación. Nel inclúense como zonas isoclimáticas as que marca a AEMET, posto que non todas as rexións teñen o mesmo limiar de temperatura máxima para dar os seus avisos por calor (non afectan da mesma maneira 35 graos en Madrid que en Mondariz).

*Mapa de niveis de risco para a saúde: https://www.sanidad.gob.es/excesoTemperaturas2024/meteosalud.do

Desde o punto de vista da protección da saúde, tamén para a poboación traballadora, é necesario incluír estas alertas epidemiolóxicas, que se incluíron na páxina de AEMET como alertas METEOSALUD, nos plans fronte á calor das empresas, posto que se demostrou que os danos á saúde comezan moitas veces antes de que se disparen as alertas meteorolóxicas por ondas de calor.

En reunión da Sección Sindical de CCOO de Paradores de Galicia, analizamos o estado da situación despois da concentración do pasado 29 de maio en Madrid e as posibles actuacións futuras.

A valoración que facemos desta concentración en Madrid é totalmente positiva. CCOO conseguiu reunir a un número importante de persoas traballadoras de Paradores (a pesar da dificultade pola dispersión dos centros de traballo), todas gritando ao unísono que queremos "negociación seria e efectiva, mellora das condicións de traballo nos paradores e cumprimento do convenio e da lexislación nos centros de traballo".

O único que botamos en falta é a participación das outras centrais sindicais presentes na negociación do convenio. Pero esperamos que poidamos contar con elas nas seguintes mobilizacións que se leven a cabo mentres non mellore a situación.

Como cuestión principal, entendemos que isto non se pode quedar aquí, que temos o deber de continuar expresando o noso malestar pola situación que se vive nos paradores e esixindo un cambio substancial na dinámica da negociación do convenio.

Non é de recibo que levemos tantos anos sen poder acadar un acordo cando os resultados económicos son cada día mellores. Entendemos que os que a dirección chama continuamente o "principal activo de Paradores" seguimos sen recibir o que nos pertence polo esforzo realizado para conseguir eses resultados e para que esta empresa pública siga mellorando en todos os sentidos. Por iso debemos seguir esixindo unha negociación real e efectiva na que se nos dea o que nos pertence.

Non é de recibo que haxa Paradores nos que non se cumpre o convenio en horarios, calendarios laborais, dereito ás licenzas retribuídas, dereito a unha conciliación efectiva, dereito á desconexión dixital, dereito a unha saúde laboral efectiva incluíndo uns ritmos de traballo razoables que non danen a nosa saúde, etc. Por iso debemos esixir en todos os centros de traballo os mínimos dereitos que temos, utilizando os medios ao noso alcance e sen ceder no máis mínimo.

Por todo isto, entendemos que temos a obriga, tanto a representación sindical como as persoas traballadoras desta empresa, de seguir reivindicándonos cada vez con máis forza ata que nos fagan caso. Non debemos permitir que isto se quede nunha concentración diante da sede da empresa e nada máis; a reivindicación ten que continuar.