CCOO Servizos anunciamos a convocatoria dunha concentración o próximo 8 de xaneiro, en horario de 11:30 a 12:30, fronte ás instalacións da empresa CIBERNOS BPO, situada no Polígono de A Grela, Rua Newton 1-3, A Coruña.

CIBERNOS BPO, dedicada á prestación de servizos de Contact Center, ten como principal cliente a galega R Telecomunicacións (grupo MasMovil), ademais de ofrecer servizos para outras empresas do grupo como Virgin Teleco.

 

Denuncias nos xulgados e Inspección de Traballo

Esta convocatoria enmárcase nunha serie de accións legais e sindicais emprendidas polo sindicato para denunciar a deterioración das condicións e relacións laborais na empresa. Dende hai tempo, denunciouse ante a Inspección de Traballo e os xulgados a preocupante limitación imposta pola empresa en asuntos cruciais como a conciliación da vida laboral e familiar. Tamén se denunciou o impedimento no goce de permisos retribuídos para o coidado de familiares enfermos ou hospitalizados, así como o incumprimento de acordos previamente asinados coa representación legal das persoas traballadoras.

 

Sanción ao traballo sindical

Un dos aspectos máis alarmantes é o intento de restrinxir o dereito á acción sindical por parte da empresa, que sancionou a tres delegadas sindicais de CCOO por exercer o seu crédito sindical. Estes feitos foron denunciados ante os xulgados en busca dunha rectificación xusta. Ademais, súmase á problemática a práctica inexistencia de comunicación por parte da empresa coa representación legal das persoas traballadoras, incumprindo de maneira constante o seu deber de información e consulta.

Visibilización do conflito

A concentración do 8 de xaneiro busca facer visible e sensibilizar á opinión pública sobre estas irregularidades laborais e sindicais, así como expresar o rexeitamento ás prácticas que atentan contra os dereitos fundamentais das persoas traballadores. O sindicato insta á empresa CIBERNOS BPO a rectificar e buscar solucións dialogadas que respecten os dereitos laborais e promovan un entorno laboral xusto e equitativo.

CCOO Servizos convocamos á terceira mobilización diante dos supermercados Froiz, o vindeiro venres, 5 de xaneiro ás 11:30 en Narón. Esta mobilización é un esforzo colectivo para facer fronte á persistencia das inxustizas laborais que afectan aos traballadores e traballadoras de Froiz.

 

Resumo das Mobilizacións Anteriores:

Nos pasados días 5 e 15 de decembro, levamos a cabo dúas concentracións para destacar as preocupacións e demandas dos traballadores/as de Froiz. As denuncias iniciais incluíron discriminación, cargas de traballo insoportables e prácticas laborais inxustas. A pesar das excelentes cifras declaradas pola empresa, as condicións laborais non melloraron.

 

Persistencia das Inxustizas Laborais:

A pesar dun aumento impresionante do 14% na conta de explotación e cifras récord de facturación, as traballadoras e traballadores seguen enfrontándose a cargas de traballo abrumadoras, cambios arbitrarios en quendas e horarios, e a denegación de asuntos propios. Froiz debe recoñecer e abordar estas inxustizas laborais.

 

Esixencias Claras e Razoadas:

Reiteramos as nosas demandas claras e razoadas:

• Abonda de cargas de traballo imposibles por falta de persoal.

• Abonda de cambios de quendas, horarios e vacacións por falta de persoal.

• Abonda de denegar asuntos propios por falta de persoal.

• Abonda de discriminar aos encargados/as.

• Abonda de realizar contratacións eventuais fraudulentas.

 

O Compromiso de CCOO:

CCOO continúa traballando xunto co persoal para asegurar que as súas voces non queden sen escoitar. A falta de resposta por parte da empresa é inaceptable, e a mobilización é necesaria para insistir no compromiso coa xustiza laboral.

No día de hoxe, 21 de decembro, CCOO Servizos xunto con outras organizacións sindicais asinamos un acordo no marco do convenio de comercio de materiais de construción de Pontevedra, sobre o cal destacamos os seguintes puntos:

Vixencia

2020-2024

Licenzas

Actualización de permisos e conciliación coa nova lexislación.

Contratación

• Fixo Discontinuo: Mínimo 4 meses con preaviso de 15 días. Censo anual e calendario de previsión de chamadas. Prioridade de incorporación ante calquera nova contratación incluído duración determinada ou indefinida. No caso de que nun período de tres anos se repitan en tempo aproximadamente coincidente os períodos de chamada fóra do período garantizado, este consolidarase como tempo garantizado. Sen Tempo Parcial.
• Tempo Parcial: En empresas con máis de 50 traballadores non poderá haber máis do 25% de contratos a tempo parcial - Xornada mínima diaria catro horas continuadas – Conversión a xornada completa daquelas que durante 60 días continuados ou de forma alternativa nun período dun ano, realicen prolongacións de xornada.
• Formación en alternancia: Retribución non inferior ao 90% o primeiro ano e 95% o segundo.
• Práctica profesional: Retribución fixada neste convenio colectivo para o grupo profesional e nivel retributivo correspondente ás funcións desempeñadas.

Compromiso emprego fixo

Obrigatorio mínimo do 80%.

Xornada laboral

40 horas semanais de luns a sábado pola mañá, rematando dito día ás 13:30 horas - Sábados excepcionais por carga ou descarga de barcos, camións, vagóns, etc. retribuídas cun incremento, polo menos, do 75% sobre o valor hora.

Retribucións

Para os anos 2020 e 2021 unha paga de 200 euros non consolidables

Ano 2022: incremento salarial do 4,00% con atrasos desde xaneiro

Ano 2023: incremento salarial do 3,50% con atrasos desde xaneiro

Ano 2024: incremento salarial do 3,00%

Revisión: Se IPCs anuais 2023 e 2024 rexistran un incremento superior á suma do incremento pactado para eses dous anos (6,5%), dito exceso, cun máximo dun 1%.

Co obxectivo de evitar atrasos derivados das dilacións nas negociacións, CCOO Servizos xunto con outras organizacións sindicais formalizamos esta mañá coa patronal un acordo exclusivamente centrado nos salarios para os anos 2022 e 2023. Comprometémonos a continuar as negociacións referentes ao texto do acordo e aos demais incrementos no mes de xaneiro de 2024.

O acordo contempla un incremento en táboas do 8% para os anos 2022 e 2023, ademais dunha paga lineal de 1.250€ proporcional a xornada e tempo traballado. Se a suma dos IPCs 2022-2023 é superior ao 8% de incrementos acordados, a diferenza terase en conta para a negociación de salarios de 2024.

Persoas traballadoras de Froiz reuníronse diante dun supermercado da cadea para protestar contra as prácticas laborais abusivas. As principais queixas inclúen cargas de traballo insoportables por falta de persoal, cambios arbitrarios en quendas e horarios, así como discriminación cara aos encargados.

A pesar de que o supermercado pechou o ano 2022 cun récord de facturación e un aumento do 14% na conta de explotación, as persoas traballadoras denuncian que as condicións laborais non reflicten este éxito económico. A falta de persoal leva a consecuencias directas, como traballo esgotador, multitarefa constante e a imposibilidade de planificar os seus calendarios laborais de forma mensual, trimestral ou anual.

"Aumentan os ingresos, pero non vemos beneficios nas nosas condicións laborais. Estamos exhaustos e non podemos seguir así", sinaliza un dos delegados de CCOO.

As protestas tamén subliñan a denegación de asuntos propios por falta de persoal e a existencia de contratos eventuais fraudulentos, o que agrava a inseguridade laboral.

Os manifestantes esixen respecto, condicións laborais xustas e un trato digno por parte da dirección do supermercado. 

A empresa en cuestión aínda non respondeu ás queixas formuladas polos traballadores. A situación está a recibir un seguimento estreito tanto polos medios como polos delegados e delegadas de CCOO.

  

Os sindicatos CCOO e UGT convocamos unha asemblea para os traballadores do sector de Oficinas e Despachos de Pontevedra, en resposta ás dificultades enfrentadas durante as negociacións do convenio laboral.

A decisión de convocar a asemblea foi tomada despois dunha nova reunión programada para a mesa de negociación. O obxectivo principal do encontro é explicar as propostas presentadas por cada sindicato, proporcionando aclaracións e respondendo ás dúbidas que os traballadores poidan ter.

A asemblea está programada para o día 12 de decembro de 2023, ás 20:00 horas, e terá lugar na sede de UGT Vigo, situada na Rúa García Barbón número 67, 5º andar.

O pasado 17 de novembro recibimos a noticia da decisión da Confederación de Empresarios de Pontevedra —órgano que asumira a negociación do Convenio de Oficinas e Despachos da Provincia de Pontevedra—, de suspender a súa participación nas conversas.

A patronal trasladou a todos os sindicatos que esta decisión foi tomada en resposta ás mobilizacións que a CIG emprendeu nos últimos días.

CCOO lamentamos tal decisión, máis tendo en conta que despois de 12 anos co convenio paralizado, conseguírase sentar á CEP para asumir a negociación grazas á mediación do CGRL.

Como expresamos anteriormente, desde CCOO consideramos que, tras tan só 3 reunións, a situación non xustificaba a ruptura, con manifestacións e folgas precipitadas e sen ter en conta o resto da parte social.

CCOO tomaremos medidas para poñernos en contacto con todas as partes involucradas co obxectivo de reconducir a situación. A nosa intención é lograr que todas as partes se volvan sentar á mesa de negociación para actualizar un convenio que urxe ser revisado, en beneficio de todo o persoal do sector. Estamos comprometidos co diálogo e a búsqueda de solucións que atendan ás necesidades dos traballadores e traballadoras deste ámbito.

CCOO-Servizos denunciamos a falta de interese da patronal de hostalaría da provincia de Pontevedra, que mantén o convenio caducado desde o 31 de decembro do 2021, hai xa case dous anos. Nnon podemos pasar outro Nadal sen regular as condicións de traballo no sector, especialmente nun momento en que os datos de ocupación están en máximos históricos.

Nunha conferencia de prensa que tivo lugar este luns en Vigo, os voceiros de CCOO, Jorge Carneiro e José Mirás, sinalaron que as patronais se queixan acotío da falta de persoal, cando ao mesmo tempo sorprenden «con declaracións ilegais e polémicas realizadas desde a patronal estatal, que defende xornadas escravistas de 12 horas diarias».

CCOO coida que cómpre «regular decontado» nun novo convenio as condicións de traballo, para o que lle reclama «axilidade» á patronal. O novo texto deberá incluír medidas para garantir a conciliación da vida persoal e a familiar, así como a mellora da cualificación profesional e dos salarios, para facer atractivas as condicións laborais do sector.

Precisamente, os baixos salarios, así como os incumprimentos en materia de xornada, os horarios que impiden a conciliación ou a falta de regulación das condicións dos fixos-descontinuos son algúns dos principais problemas.

Con data 4 de outubro do 2023 volveuse a reunir a mesa negociadora do convenio colectivo de Oficinas e Despachos da Provincia de Pontevedra. Na última reunión a patronal comprometeuse a expoñer unha proposta económica:

Revalorización salarial

• Ano 2023: 4%
• Ano 2024: 3%
• Ano 2025: 3%

Devanditos incrementos aplicaríanse sobre as táboas salariais do ano 2011 sen pago de atrasos e creando un complemento para aqueles grupos profesionais cuxas táboas salariais quedasen por baixo do SMI.

CCOO deixámos claro que se deben actualizar previamente todas as táboas salariais ao SMI e a partir de aí negociar sobre o incremento salarial.

 

Antigüidade

Eliminación da antigüidade. CCOO manifestamos que non estamos dispostos a eliminar unha antigüidade que foi a que permitiu durante todos estes anos un mínimo de incremento salarial.

 

Seguinte reunión, 19 de outubro

Tras apenas unha hora de reunión, a CIG como sindicato maioritario na mesa, deixou a porta aberta a poder aceptar a proposta de incremento salarial da patronal sen tocar o resto do convenio e mesmo a abordar a eliminación da antigüidade.

Para iso propúxolle á patronal presentar unha proposta de táboas salariais que contemple o devandito escenario e así podelo consultar coa súa base afiliativa.

Desde CCOO deixamos constancia que non estabamos de acordo con dita proposta e que non se trataba dunha postura conxunta da mesa negociadora.

Seguiremos defendendo que as persoas traballadoras do sector de oficinas e despachos de Pontevedra se merecen uns salarios dignos e á altura do convenio doutras provincias da nosa comunidade autónoma.