CCOO Servizos asinamos un preacordo do convenio para o sector da hostalaría en Pontevedra, con vixencia durante os anos 2024 e 2025. O documento supón un avance histórico en condicións laborais, con melloras salariais, novos dereitos sociais e un recoñecemento profesional especial ás camareiras de piso e ao persoal fixo descontinuo.

Suba salarial e garantía de poder adquisitivo

O acordo establece un incremento do 7% en dous anos, así como unha cláusula de revisión vinculada ao IPC real, co obxectivo de evitar perdas de poder adquisitivo.

Novos dereitos sociais

Entre as novidades destacan:

• Permiso retribuído para levar fillos e fillas menores de 16 anos ao médico.

• Permiso por hospitalización fraccionable, aplicable mentres persista a causa.

Recoñecemento ás camareiras de piso

A partir do 1 de xaneiro de 2027, as camareiras de piso con 36 meses de antigüidade en hoteis de 3, 4 e 5 estrelas pasarán ao grupo salarial 8, un paso que CCOO considera o inicio dun proceso para recoñecer a especialización e responsabilidade deste colectivo. Ademais, desaparece o grupo 10 e os postos de axudante e auxiliar (grupo 9) ascenderán de categoría tras dous anos, sempre que conten coa cualificación requirida.

Persoal fixo descontinuo: estabilidade e dereitos

O preacordo tamén introduce unha regulación mínima para garantir contratacións máis xustas e estables:

• En establecementos abertos todo o ano: chamamento mínimo de 8 meses e medio e garantía de 20 horas semanais.

• En establecementos de apertura parcial:

  • Apertura ≤ 3 meses: mínimo 50% da duración.

  • Apertura = 4 meses: mínimo 60%.

  • Apertura ≥ 5 meses: mínimo 70%.

Unha hostalaría con dereitos

Este preacordo representa “un avance colectivo en estabilidade, dignidade e recoñecemento profesional”, freando a temporalidade extrema e mellorando os ingresos do persoal.

As traballadoras e traballadores da hostalaría da provincia da Coruña, tras a celebración de asembleas en A Coruña, Santiago e Ferrol, expresan un rexeitamento absoluto e unánime á actitude da patronal no marco da negociación do convenio colectivo.

Mentres o sector aumenta os seus beneficios, a patronal mantén o bloqueo

O sector da hostalaría vive un momento de máxima actividade e beneficios récord. Con todo:

• As cargas de traballo seguen aumentando de maneira continuada.

• A patronal bloquea a negociación do novo convenio.

• Os salarios permanecen conxelados.

• Preténdese recortar dereitos laborais fundamentais, como o cobro íntegro durante as baixas médicas.
  
  As condicións laborais non poden seguir deteriorándose

As propostas da patronal supoñen máis esforzo para o persoal, menos dereitos e a continuidade dos salarios conxelados. Esta situación é inaceptable e non será asumida pola representación das traballadoras e traballadores.

Se non hai avances, haberá resposta

Se na próxima reunión a parte empresarial mantén a mesma postura de bloqueo, as traballadoras e traballadores do sector están dispostos a responder con firmeza. O malestar é profundo e o límite xa foi superado.

As traballadoras e traballadores da hostalaría da provincia da Coruña afirman con rotundidade: Abonda xa.

A xuntanza do 8 de xullo foi breve pero deixou avances relevantes.

Na anterior reunión CCOO sostivemos a proposta dun 8 % de incremento en dous anos, que finalmente foi asumida pola CIG tras rectificar a súa postura anterior.

Pola súa parte, a patronal mantén unha posición restritiva:

• Ofrece un incremento máximo do 6,5 % en dous anos.
• Contratos fixos-descontinuos: un mínimo do 50% do tempo de apertura en establecementos de tempada, mantendo os 5 meses para os que abren todo o ano.

Desde CCOO, coa vontade de seguir avanzando cara ao acordo, formulamos unha proposta revisada e equilibrada, asumida tamén por UGT:

Proposta económica:

• Incremento do 7,2 % en dous anos
• Camareiras de pisos → Nivel salarial 8:
  • A partir do 1/01/2026: complemento de 40 €
  • A partir do 1/01/2027: incremento de 47 € nese complemento
  • A partir do 1/01/2028: paso definitivo ao nivel 8
• Axudantes e auxiliares:
  • Ascenso automático á categoría superior aos dous anos, sempre que se demostren os coñecementos necesarios.
• Contratos fixos-descontinuos:
  • Manter o mínimo do 70 % do período de apertura nos contratos de establecementos de tempada.

Esta proposta foi ratificada por UGT, reforzando o consenso sindical.

A patronal comprometeuse a valorar con detalle as propostas e a dar resposta na próxima reunión, fixada para o día 21 de xullo ás 16:30 h.

Desde CCOO seguiremos impulsando o diálogo e defendendo melloras reais para as traballadoras e traballadores da hostalaría na provincia de Pontevedra.

Como comezo da xuntanza da mesa do convenio de hostalaría de Pontevedra, celebrado o pasado 1 de xullo, a patronal recriminou á CIG a convocatoria das concentracións unilaterais, xa que a mesa continúa aberta e con posibilidades reais de acordo.

O tema centra actualmente a atención en dúas cuestións principais, sen prexuízo doutras incluídas na plataforma.

Sobre o contrato fixo-descontinuo

Desde CCOO propuxemos un achegamento nos seguintes termos:

• Establecer un mínimo de 5 meses para os establecementos abertos todo o ano.
• Para os que abren por tempada, fixar un mínimo do 75 % do tempo de apertura previsto.
• No caso do fixo-descontinuo a tempo parcial, establecer tamén un mínimo de 5 meses e 20 horas semanais.
• Incluir a posibilidade de aplicar o contrato por eventos, coa mesma redacción que figura no convenio da Coruña.
• No resto de aspectos vinculados a este contrato, xa había practicamente un acordo, polo que non se volveron tratar.

A parte empresarial valorou positivamente este achegamento e comunicou que o estudará en profundidade, abríndose á posibilidade de acordo.

Sobre as condicións económicas

Desde CCOO propuxemos:

— Un incremento salarial do 8 % en dous anos, cunha cláusula de revisión vinculada ao IPC real en 2025.
— A integración progresiva da categoría de camareira de pisos no nivel salarial 8.
— Aclarar o contido do artigo 10 respecto ao ascenso automático de axudantes e auxiliares, para que sexa aplicable a todo o persoal e se adapte á realidade actual.

UGT sumouse a esta proposta, achegando outras cuestións complementarias.

Sorprendeu a posición da CIG, que tras convocar mobilizacións unilaterais, presentou unha proposta económica do 6,8 % en dous anos, inferior á formulada por CCOO, facilitando así a defensa dunha suba máis contida por parte da patronal.

Lembramos que, para que o convenio teña eficacia plena, é necesaria a sinatura de polo menos dous sindicatos; a dunha soa organización non é suficiente. Quedamos pendentes da reacción da patronal ante a proposta da CIG.

Vindeira xuntanza o 8 de xullo ás 16:30

Emprázamonos para unha nova xuntanza o vindeiro día 8 ás 16:30, coa intención de avanzar cara á sinatura do convenio antes de rematar o verán.

Resulta difícil comprender a estratexia da CIG: convoca unha concentración para chegar á mesa e logo presenta unha proposta inferior á do resto das organizacións sindicais.

Reiteramos que estamos á vosa disposición para aclarar calquera dúbida ou inquedanza.

A patronal da hostalaría da provincia da Coruña, nun acto de total cobiza, pretende aumentar aínda máis os seus crecentes beneficios ? a costa de impoñer condicións laborais escravistas.

O que queren impor

• Quitar o complemento que temos agora nas baixas médicas
• O máximo beneficio a costa da túa conxelación salarial.
• Manter os continuos excesos de xornada sen pagar as horas extraordinarias.
• Nula posibilidade de conciliación da vida laboral e familiar pola falta de días de descanso.
  
  CONVOCÁMOSTE ÁS ASEMBLEAS INFORMATIVAS

Para analizar esta situación, convocámoste ás asembleas informativas que terán lugar o vindeiro luns, 14 de xullo, nos seguintes horarios e lugares:
 

Sorpréndenos a decisión unilateral da CIG de convocar mobilizacións, especialmente porque participaron activamente na mesa de negociación e nunca expresaron intención de mobilizarse.

Desde CCOO apostamos pola unidade, polo diálogo e por sumar forzas. Cústanos entender que outro sindicato actúe por libre, sen informar ao resto dos presentes na mesa. Esta actitude pon en risco un posible acordo que tiñamos opción de pechar antes de agosto.

Nós seguimos traballando arreo por un convenio que mellore de verdade as condicións laborais nun sector en auxe: con máis noites de estancia, máis visitantes e máis gasto medio.

Fixamos un límite claro ante a patronal: acordo antes de agosto!

E lembramos: a CIG tamén está nesta mesa.

Se non se consegue un pacto que beneficie a todas as persoas traballadoras da hostalería pontevedresa, CCOO poremos en marcha as nosas propias mobilizacións en agosto.

Seguiremos informando paso a paso. A vosa participación e a unidade son claves para acadar un convenio xusto e digno.