O comité de empresa de Teleperformance na Coruña anunciou a convocatoria de mobilizacións o 10 de xuño en resposta ao novo expediente de regulación de emprego (ERE) anunciado pola compañía.

As mobilizacións incluirán paros laborais de 11:00 a 14:00 e de 16:00 a 19:00 horas, así como unha concentración diante das oficinas de Vodafone na praza de Pontevedra, ás 12:00 horas.

Afectación do ERE en Teleperformance A Coruña

O novo ERE supón a perda de 27 postos de traballo no centro de Teleperformance da Coruña, situado no polígono da Agrela. Este centro conta actualmente con 427 traballadoras e traballadores.
A afectación céntrase integramente no persoal adscrito ao servizo de Vodafone, que xa sufriu un axuste importante en outubro de 2023, cando 41 persoas foron despedidas.

Impacto estatal do ERE

A mesa negociadora do novo ERE constituíuse o pasado 30 de maio e afecta un total de 321 persoas en centros de traballo de seis cidades do Estado.
Teleperformance, líder mundial no sector dos contact centers, emprega a 11.000 persoas en España e máis de 138.000 en 47 países. Desde a adquisición do grupo Majorel en 2023, a empresa executou xa catro ERE, dous deles directamente na propia Teleperformance.

Denuncia da destrución de emprego

O comité de empresa denuncia a destrución deliberada de emprego, a pesar dos beneficios millonarios das empresas para as que presta servizo Teleperformance.
Destacan tamén que este sector está altamente feminizado e que a maior parte do persoal afectado na Coruña ten máis de 50 anos e unha ampla experiencia profesional.

____________________________________

Actualización: Imaxes da concentración do día 10 de xuño

As principais denuncias do comité teñen que ver coa precariedade na contratación, xornadas parciais, modificación de horarios a criterio da empresa ou o elevado risco psicosocial. Por esta razón, concentráronse durante a mañá diante da oficina do Banco Santander no Cantón Grande, n.º 4 (A Coruña)

Actualmente, a empresa conta en toda a provincia da Coruña cun cadro de persoal de arredor de 1400 persoas e dedícase ao sector dos centros de chamadas. Pertence ao grupo Konecta, unha das principais multinacionais do sector, e dá servizo a clientes como o mencionado Banco Santander, Abanca ou Inditex, entre outros.

Elevada esixencia, pouca formación

Segundo o comité, o centro de traballo de Bergondo dispón duns douscentos traballadores e traballadoras para a campaña Superlínea do Banco Santander. Trátase dun cliente «moi esixente» que «non facilita as cousas» á hora de lles trasladar os procedementos aos axentes que prestan servizo nela, resumen desde o comité.

Isto indice, precisamente, nunha das cuestións que denuncian: o risco psicosocial. O comité denunciou xa en varias ocasións a «nula formación» que recibe o persoal, relacionado cos criterios de selección. «Fanse contratacións sen requisito específico ningún, nin coñecementos bancarios previos», apuntan, «porén, despois expóñense a unha presión e esixencias de calidade que nada teñen que ver coa formación recibida», conclúen.

Folga a finais de mes

Se non hai ningún avance canto ás demandas do persoal, o vindeiro 28 de xuño (venres) haberá unha folga parcial, con paros de dúas horas na quenda de mañá e outras tantas na da tarde, advirte a representación legal das persoas traballadoras.

Hoxe celebramos unha asemblea de delegados e delegadas de Contact Center de CCOO Servicios Galicia na que se abordaron e analizaron diversos temas que preocupan fondamente as persoas traballadoras do sector.

Entre os principais asuntos, destacamos a elevada temporalidade nos nosos cadros de persoal, un problema que afecta á estabilidade laboral e á calidade de vida de moitas persoas e que precariza o noso sector cada vez máis, cando somos persoas traballadoras que damos servizo as grandes marcas e multinacionais do noso país, tales como as telecomunicacións, banca, seguros e mutuas, que se lucran da nosa precariedade.

Tamén puxemos sobre a mesa os riscos psicosociais que enfrontamos diariamente. A presión constante, a carga de traballo excesiva e a falta de recoñecemento son aspectos que deterioran a nosa saúde mental e física. Neste sentido, reclamamos medidas urxentes para mellorar as condicións laborais e garantir un entorno de traballo seguro e saudable.

Outro tema crucial que tratamos foron as subrogacións continuas. Estas prácticas, que supoñen cambios frecuentes de empresa, xeran incerteza e dificultan a creación de vínculos sólidos dentro dos cadros de persoal, afectando negativamente tanto ao rendemento como ao benestar dos traballadores e traballadoras.

Queremos subliñar ademais que os nosos son uns dos cadros de persoal máis feminizados de todos os sectores. Esta característica fai aínda máis importante abordar cuestións como a conciliación familiar e laboral, un aspecto no que, lamentablemente, estamos moi descoidados. A falta de medidas que permitan compatibilizar o traballo coa vida familiar é unha realidade que afecta especialmente ás mulleres, perpetuando desigualdades que debemos combater con decisión.

Desde CCOO, reafirmamos o noso compromiso coa defensa dos dereitos de todos e todas as traballadoras do sector de contact center. Seguiremos loitando por un emprego digno, estable e en condicións xustas. Porque xuntos e xuntas, somos máis fortes.

Animamos a todo o persoal a unirse ás nosas reivindicacións. A voz de todas as persoas traballadoras é fundamental para seguir avanzando cara un futuro mellor.

O persoal de DXC Technology na Coruña e Santiago convoca tres xornadas de folga, coincidentes coas que haberá no resto de centros de traballo no Estado. Comezarán o vindeiro luns, día 3 de xuño e continuarán o 4 e o 5. Asemade, comezarán a protestar diante dos principais clientes da empresa. De feito, o luns concentraranse entre as 10:45 e as 11:45 horas diante das oficinas de Abanca e Bankinter situadas no n.º 30 da rúa Nova da Coruña.

Con estas mobilizacións será o terceiro mes consecutivo con folgas do persoal de DXC, que xa tivo dous días de paro en marzo e outros dous en abril.

DXC Technology é unha multinacional que proporciona servizos informáticos e de xestión ás principais empresas do sector bancario, enerxético e Administracións públicas: Abanca, Evo Banco, Zurich, Mango, MRW, EDP, Carrefour, Caixabank e boa parte do Ibex-35.

Actualmente existe un conflito coa compañía pola perda de poder adquisitivo dos salarios debido á inflación, de ata o 17 % nos últimos tres anos. Polo de agora, as propostas da empresa están extremadamente afastadas do que pide a parte social. A situación contrasta coa presentación de ingresos récord ano tras ano.
 

Convocatoria

• Día: luns, 3 de xuño do 2024

• Hora: 10:45 horas

• Lugar: oficinas de Abanca e Bankinter da rúa Nova, n.º 30 (A Coruña)

_______________________________________________________________

Actualización:
Primeira das tres xornadas de folga convocadas en DXC Technology. Imaxes das concentracións:

O Comité de Empresa de Teleperformance A Coruña convocou folga de 24 horas para hoxe, luns 29, en resposta ás políticas da empresa que afectan directamente as persoas traballadoras deste centro.

Ademais, realizouse unha concentración ás 12:00 horas diante das instalacións da Teleperformance na Rúa Newton 5, onde as persoas traballadoras expresaron o seu descontento e esixiron cambios nas políticas empresariais.

Os motivos desta mobilización inclúen despedimentos inxustificados, presión constante por resultados sobre as persoas traballadoras, falta de comunicación cos representantes legais dos/as traballadores/as e a redución continua de postos de traballo debido á deslocalización de servizos e aos ERE’s aplicados pola empresa:

Non fai moito, a delegación de Coruña ocupaba a case 1.000 persoas traballadoras. Cando en outubro do ano pasado a empresa levou adiante un ERE nas campañas de Vodafone e Netflix o ERE afectou a 42 persoas na Coruña e o volume de persoal era dunhas 520 persoas.

Pasados 5 meses do ERE, na Coruña somos 450 persoas traballadoras, 70 persoas menos, non 42. E desde fai uns anos, máis de 500 persoas menos.

O Comité de Empresa destaca que estas accións crean un ambiente de medo constante entre os traballadores, prexudicando o clima laboral.

O obxectivo desta folga e concentración é manifestar publicamente o descontento dos traballadores de Teleperformance A Coruña e esixir un cambio nas políticas da empresa en relación co seu persoal: Abonda de presións constantes e temor continuo a despedimentos.

O persoal de DXC Technology, unha empresa multinacional dedicada á prestación de servizos informáticos e xestión de procesos para importantes empresas do sector bancario, enerxético e administracións públicas, volveu ás rúas en protesta polas súas condicións laborais. As seccións sindicais de varias organizacións, incluíndo CCOO, CGT, CSI, USO, Intersindical-CSC, UGT e CNT, convocaron unha folga para os días 29 e 30 de abril.

O conflito entre o persoal e a empresa medra debido ás perdas acumuladas no salario, que se relacionan cunha inflación que alcanzou ata o 17% nos últimos tres anos. As propostas presentadas pola compañía non satisfacen as demandas dos traballadores, deixando unha gran distancia entre as partes.

A pesar de presentar ingresos récord ano tras ano e ser a súa división en España unha das mellores a nivel mundial, o persoal sinala que estas cifras non reflicten a súa situación, xa que consideran que as ganancias da empresa son obtidas á custa da devaluación dos seus salarios.

Durante as xornadas de folga, celebraranse concentracións e manifestacións por parte do persoal, co obxectivo de presionar á empresa para que atenda as súas demandas. En A Coruña, hoxe, 29 de abril realizouse unha concentración diante das oficinas de DXC Technology no Polígono de A Grela. A seguinte será diante do Obelisco na Rúa Nova, o 30 de abril ás 11:00 horas.

Este movemento pon de manifesto a importancia da negociación e a mobilización do persoal para facer valer os seus dereitos laborais nun contexto de conflito.

As seccións sindicais de Comisións Obreiras (CCOO) e outras organizacións convocamos en todo o Estado folga e mobilizacións pola recuperación do poder adquisitivo en DXC Technology, empresa multinacional de consultoría e tecnoloxía da información. A compañía dá emprego en todo o Estado a unhas 7500 persoas e presta servizos ás principais empresas do sector bancario, enerxético e Administracións públicas: Abanca, Evo Banco, Zurich, Mango, MRW, EDP, Carrefour, Caixabank e boa parte do Ibex-35.

A inflación provocou unha desvalorización dos salarios de ata o 17 % nos últimos tres anos. Polo de agora, as propostas da empresa «están extremadamente afastadas» do que pide a parte social. A situación «contrasta coa presentación de ingresos récord ano tras ano», sinalan os representantes das persoas traballadoras.

Por este motivo e ante a falta de acordo diante do servizo de mediación e arbitraxe (SMAC), convocaromos varias xornadas de folga en toda España. Na Coruña foi este venres, día 22 de marzo, e haberá unha manifestación ás 10:30 desde a rúa Nova n.º 2 (Obelisco).

As seccións sindicais de CCOO, CGT, CSI, USO, Intersindical-CSC, UGT nunha das cinco empresas do grupo e CNT fan un chamamento para realizar 7 días de folga no grupo. As 7.500 persoas traballadoras están convocadas a folga os próximos 21 e 22 de marzo, 29 e 30 de abril e 3, 4 e 5 de xuño.

O grupo DXC Technology é unha empresa multinacional que proporciona servizos informáticos e xestión de procesos nas principais empresas do sector bancario, enerxético e administracións públicas de todo o estado. Algúns dos seus principais clientes son: ABANCA, EVO BANCO, Zurich, Mango, MRW, EDP, Carrefour, Caixabank e a maioría das empresas do IBEX 35.

Actualmente, existe un conflito coa compañía polas perdas acumuladas no salario, debido á inflación de ata o 17% nos últimos 3 anos. Ata o momento, as propostas presentadas pola compañía están extremadamente afastadas da posición sindical.
Esta situación contrasta coa presentación de ingresos récord ano tras ano, que sitúa a DXC España como unha das mellores rexións da multinacional a nivel mundial. As diferentes seccións sindicais consideran que estes resultados en boa medida son obtidos pola devaluación dos salarios dos traballadores.
Durante as xornadas de folga realizaranse concentracións e manifestacións reivindicativas da plantilla, así como outro tipo de accións co obxectivo de mover á empresa das súas posicións intransixentes e codiciosas. 
En A Coruña levarase a cabo unha concentración diante do Obelisco na Rúa Nova, 2 o día 22 de marzo ás 10:30 horas.

Finalmente, recordamos que no pasado outras folgas na compañía supuxeron problemas de primeira orde na operativa habitual de bancos, loxística e enerxía. Os sindicatos convocantes citaron a DXC ante o Servizo Interconfederal de Mediación e Arbitraxe para retomar a negociación co resultado de "sen acordo".

O comité de empresa de Teleperformance na Coruña, comprometido coa defensa dos dereitos laborais e a estabilidade dos traballadores, celebramos hoxe luns, once de marzo, unha concentración de delegadas e delegados de 13 a 14 horas, fronte ás instalacións da empresa. Esta acción ten como obxectivo denunciar a destrución de emprego na delegación coruñesa, así como visibilizar a precaria situación laboral que está a afectar ao persoal.

Contexto

Fomos testemuñas da desaparición de servizos históricos nesta delegación, que levou a unha redución significativa do persoal, pasando de case mil traballadores a só 515. A deslocalización a Colombia do servizo de atención ao cliente de Unión Fenosa Distribución e un ERE estatal que afectou a 38 persoas na nosa delegación —300 en todo o Estado— son situacións que contribuíron ao actual panorama laboral.

Desafíos Actuais

Neste momento, estamos a enfrontar un constante goteo de despedimentos, cualificados pola empresa como disciplinarios. Sen embargo, o comité vaticina que todos eles acabarán sendo declarados improcedentes, o que xera unha preocupación constante no persoal. Esta incerteza sobre o futuro laboral xera un ambiente de traballo baixo ameazas e presións constantes, onde cada traballador vive co temor de ser o próximo en ser despedido.
 

Propósito da Concentración

A concentración pretende ser un acto de visibilización e solidariedade entre os traballadores. Buscamos concienciar á opinión pública sobre a situación que estamos a vivir e reclamar unha solución que garanta a estabilidade laboral, o respecto aos dereitos dos traballadores e a continuidade dos servizos na nosa delegación.