Hoxe, 25 de xuño, o persoal do comercio da alimentación de Ourense concentrámonos diante da sede central de Gadis, no polígono da Piadela (Betanzos), para esixir un convenio colectivo xusto, con salarios dignos e condicións equitativas, como nas demais provincias galegas.

A protesta forma parte do calendario de mobilizacións convocadas polas centrais sindicais ante o bloqueo da negociación, mentres empresas como Froiz, Gadis e Cuevas acumulan beneficios e manteñen ao persoal con salarios conxelados e dereitos estancados.

Desde CCOO servizos lembramos que durante a pandemia, as traballadoras e traballadores demostraron un compromiso total, e agora esiximos recoñecemento real con melloras salariais e sociais.

Non imos permitir que se nos siga ignorando. O convenio debe reflectir a realidade do sector e o esforzo do seu persoal.

Sorpréndenos a decisión unilateral da CIG de convocar mobilizacións, especialmente porque participaron activamente na mesa de negociación e nunca expresaron intención de mobilizarse.

Desde CCOO apostamos pola unidade, polo diálogo e por sumar forzas. Cústanos entender que outro sindicato actúe por libre, sen informar ao resto dos presentes na mesa. Esta actitude pon en risco un posible acordo que tiñamos opción de pechar antes de agosto.

Nós seguimos traballando arreo por un convenio que mellore de verdade as condicións laborais nun sector en auxe: con máis noites de estancia, máis visitantes e máis gasto medio.

Fixamos un límite claro ante a patronal: acordo antes de agosto!

E lembramos: a CIG tamén está nesta mesa.

Se non se consegue un pacto que beneficie a todas as persoas traballadoras da hostalería pontevedresa, CCOO poremos en marcha as nosas propias mobilizacións en agosto.

Seguiremos informando paso a paso. A vosa participación e a unidade son claves para acadar un convenio xusto e digno.

Concentración en Poio contra a desigualdade salarial no sector da alimentación

Este luns, 23 de xuño, traballadoras e traballadores do sector do comercio da alimentación da provincia de Ourense concentráronse diante da sede central de Froiz, en Poio (Pontevedra). A mobilización serviu para esixir un convenio colectivo xusto, con salarios dignos e condicións laborais equitativas, en igualdade co resto das provincias galegas.

Un convenio bloqueado mentres aumentan os beneficios empresariais

A protesta forma parte do calendario de accións impulsado polas centrais sindicais ante o bloqueo da negociación do convenio colectivo do comercio da alimentación de Ourense, paralizado dende hai meses.

Durante a concentración, denunciouse que empresas como Froiz, Gadis ou Cuevas, con beneficios millonarios e en constante expansión, manteñen ao persoal ourensán con salarios conxelados, xornadas intensas e sen avances en dereitos laborais.

Recoñecemento ao esforzo: compromiso e dignidade

Desde a Federación de Servizos de CCOO Galicia, lembrouse que o persoal do sector demostrou un compromiso exemplar durante a pandemia, garantindo o abastecemento e o funcionamento das tendas en situacións críticas. Agora, esíxese que ese esforzo sexa recoñecido con melloras salariais e sociais reais.

As mobilizacións continúan

Esta acción únese ás xa realizadas e ás previstas para os próximos días. O martes 24 terá lugar unha nova concentración en Ourense diante da sede de Cuevas, e o mércores 25 outra diante da sede de Gadis no polígono da Piadela (Betanzos), onde tamén se convocou unha rolda de prensa.

Desde CCOO non imos permitir que se nos siga ignorando. O convenio de alimentación de Ourense debe reflectir a realidade do sector e o esforzo do seu persoal.

As centrais sindicais USO, CIG, CCOO e UGT, tivemos unha asemblea conxunta co persoal do sector comercio da alimentación en Ourense, onde reafirmamos a nosa unidade de acción para facer fronte á patronal.

A patronal (Gadis, Cuevas e Froiz) segue negándose a recoñecer a desigualdade salarial que sufrimos, alegando que o custo da vida aquí é menor. Nós rexeitamos esa escusa: o noso traballo é o mesmo!

Na asemblea, que tivo apoio unánime, acordamos intensificar as medidas de presión para conseguir un convenio xusto:

Dúas concentracións semanais de xornada completa diante das tendas máis importantes das empresas implicadas, para informar á clientela sobre esta inxustiza.

• Próximas concentracións:

• 23, 24 e 25 de xuño de 11:00 a 12:00 horas nas seguintes ubicacións:
  • Día 25 - Central Loxistica de GADIS en Piadela – A Coruña
  • Día 24 - Central Loxistica de Cuevas en Ourense.
  • Día 23 - Central Loxística de FROIZ en Poio - Pontevedra.

As seguintes concentración celebraranse en horario de 10:30 a 12:30 e 19:30 ata peche, os seguintes días: Ler máis

____________________________________

Actualización: Imaxes da concentración do día 24 de xuño diante do centro loxístico de Grupo Cuevas

O Tribunal Superior de Xustiza de Galicia (TSXG) vén de confirmar que a cadea Distribuciones Froiz S.A.U. vulnerou os dereitos fundamentais dunha delegada sindical de Comisións Obreiras en Lugo. A traballadora, presidenta do comité de empresa, fora sancionada con 14 días sen emprego nin soldo por exercer o seu labor sindical.

A sentenza declara nula a sanción e obriga a indemnizar

A sentenza, datada o 4 de xuño de 2025, desestima o recurso da empresa e ratifica o fallo previo do Xulgado do Social nº 1 de Lugo, que xa recoñecera en xullo de 2024 a vulneración de dereitos.

A resolución obriga Froiz a:

• Anular a sanción imposta á delegada

• Reintegrar os salarios non percibidos

• Indemnizar polos danos morais causados

Trátase da segunda condena xudicial contra Froiz por feitos similares en Lugo, o que confirma unha liña de actuación reiterada contra a representación sindical.

A sanción foi unha represalia polo labor sindical

Segundo o contido da sentenza, quedou acreditado que a sanción foi unha represalia directa polas tarefas sindicais desenvolvidas pola delegada, no contexto do conflito pola negociación do convenio colectivo provincial de alimentación.

A resolución tamén destaca que esta conduta antisindical afecta outros representantes do persoal, polo que a dimensión do conflito é colectiva.

Froiz intenta coartar o traballo sindical en Lugo

Desde a Federación de Servizos de CCOO de Galicia, denunciamos que Froiz intenta coartar e castigar o traballo sindical, empregando a vía das sancións como mecanismo de presión. Este comportamento obríganos a acudir á Xustiza para defender dereitos fundamentais.

CCOO seguirá defendendo os dereitos do persoal

A pesar das prácticas ilegais da empresa, en CCOO temos claro que non imos deixar de facer o que temos que facer: defender os intereses do persoal de Froiz.

Reclamamos o cesamento inmediato das prácticas antisindicais e o respecto á lexítima representación das traballadoras e traballadores.

Conclusión: o sindicalismo é un dereito, e defendelo é unha obriga

As sentenzas contra Froiz demostran que a loita sindical é necesaria e lexítima. Desde CCOO reafirmamos o noso compromiso co persoal da empresa e seguiremos actuando con firmeza para que se respecte a liberdade sindical e os dereitos laborais.

Unha representación das persoas traballadoras do sector do comercio da alimentación de Ourense mantivemos hoxe unha serie de reunións con representantes dos grupos parlamentarios de BNG, PSOE e grupo mixto do parlamento Galego, e a portavoz do grupo parlamentario Sumar, Verónica Martínez Barbero no Parlamento Español, co obxectivo de trasladarlles a crítica situación que atravesa a negociación do convenio colectivo provincial.

Durante os encontros, a representación sindical explicamos o bloqueo provocado pola negativa da patronal a atender reivindicacións laborais básicas, a pesar do éxito das xornadas de folga xa celebradas e do amplo respaldo das traballadoras e traballadores do sector.

Solicitamos un apoio político claro e visible, así como colaboración para romper o silencio informativo que pesa sobre este conflito, que afecta a milleiros de persoas en toda a provincia de Ourense.

Os distintos grupos parlamentarios amosaron interese polas demandas trasladadas e comprometéronse a estudar vías para darlles visibilidade tanto nas institucións como nos espazos públicos.

Desde os sindicatos convocantes —CCOO, CIG, UGT e USO— valoramos positivamente a receptividade amosada por todos os grupos e reiteramos o noso compromiso de seguir sumando apoios sociais e institucionais para conquistar un convenio xusto, digno e que recoñeza o valor do traballo de quen sostiña o sector mesmo nos momentos máis duros.

Onte tivemos en Galicia un encontro de gran relevancia con delegadas e delegados de Gadis, Froiz e Eroski. Xuntámonos para afondar en cuestións fundamentais: como seguir fortalecendo o noso traballo sindical no día a día.

Contamos coa presenza de Iván Cordeiro, secretario xeral da Federación de Servizos de CCOO en Galicia, e tamén con Ángel Trujillo, responsable estatal do sector de supermercados. Un luxo ter a súa experiencia e visión!

Durante a xornada falamos claro:

• Como reforzar a nosa organización desde dentro
• Como avanzar nun modelo federal que nos una por riba das diferenzas entre provincias
• E como crear formas de traballar conxuntas que nos fagan máis fortes fronte ás empresas

Porque o sindicalismo non se constrúe só dende os despachos: constrúese coas persoas. Coa unidade, coa coordinación e coa participación.

Seguimos loitando polos dereitos de quen traballa no sector da alimentación.
Se ti tamén queres sumar: afíliate, organiza, participa!

Onte celebramos unha reunión de traballo coa Sección Sindical Estatal de LIDL para analizar e compartir a situación laboral da empresa, así como para establecer liñas de actuación conxunta no marco do convenio e das demandas do persoal.

Na xuntanza participaron Ángel Trujillo e Patricia Mariño, pola Sección Sindical Estatal, e, en representación da Federación de Servizos de Galicia, Iván Cordeiro (secretario xeral), Rocío González (secretaria de organización) e Isabel Fernández (secretaria de desenvolvemento federativo de Galicia).

Durante a reunión abordáronse cuestións prioritarias para o persoal de LIDL, como:
– A sobrecarga de tarefas e a mellora das condicións de traballo.
– A xestión de horarios e quendas.
– A necesidade de garantir as axudas de custo e favorecer a conciliación laboral e familiar.

A Federación de Servizos de Galicia reitera o seu compromiso coas traballadoras e traballadores de LIDL, así como a súa vontade de manter un seguimento constante desta problemática e impulsar novos encontros que permitan avanzar cara a solucións reais e efectivas.

O compromiso coa mellora das condicións laborais e a defensa dos dereitos das persoas traballadoras require traballo conxunto e a colaboración constante.

O conflito no sector de comercio de alimentación de Ourense xurdiu pola falta de avances nas negociacións do convenio provincial, que leva anos caducado e mantén condicións salariais moi por baixo das outras provincias galegas. Mentres o persoal de supermercados de Froiz, Gadis e Grupo Cuevas de Ourense realiza as mesmas tarefas có persoal de Lugo, Pontevedra ou A Coruña, perciben salarios máis baixos, algo que é totalmente inxusto.

Patronal inmobilista
A patronal mantivo unha postura inmobilista, sen presentar propostas concretas para corrixir estas diferenzas e mellorar as condicións laborais. Ante esta situación, as traballadoras e traballadores, organizados pola representación sindical de CCOO, USO, CIG e UGT, reclamaron o mesmo salario polo mesmo traballo e subas salariais xustas que recoñezan o esforzo diario que realizan.

Folga e mobilizacións
Despois de chamadas ao diálogo e mediacións sen éxito, as persoas traballadoras en asemblea, apoiadas pola representación sindical, decidiron dar un paso firme. O 16 de maio convocouse unha primeira xornada de folga que xa contou cun seguimento superior ao 90%, demostrando a disposición do persoal do sector a defender as súas reivindicacións. Posteriormente, os días 6 e 7 de xuño convocouse unha nova folga, cun seguimento masivo en toda a provincia, deixando claro que o persoal non está disposto a seguir soportando estas condicións.

Ademais, o día 7 de xuño tiveron lugar mobilizacións multitudinarias nas rúas de Ourense, onde as traballadoras e traballadores fixeron visible a súa demanda de igualdade salarial e dignidade laboral. A mensaxe foi clara: non hai xustificación para que as mesmas empresas paguen menos en Ourense que noutras provincias galegas.

A loita continúa
Desde a representación sindical advertimos á patronal que, de non presentar avances reais nas negociacións, as mobilizacións poderán continuar e mesmo intensificarse nas vindeiras semanas. A unidade e a participación nestas xornadas de folga e manifestacións deixan claro que o sector está preparado para loitar polo que lle corresponde: un convenio provincial digno, xusto e igualitario.