Revisión salarial en EROSKI pola aplicación da Reforma Laboral
As persoas traballadoras de Vegalsa- Eroski non somos traballadores de segunda, por iso CCOO levamos un ano reivindicando a subida salarial que nos corresponde, por xustiza social e pola aplicación da Reforma Laboral. Hoxe tras unha dura negociación coa empresa informamos os resultados: A partir de 01 xaneiro do 2023 todos os traballadores de Vegalsa, nas categorías máis baixas e a xornada completa, pasarán a ter: Ler máis
O comercio de metal de Pontevedra mobilizouse o sábado en Vigo e comeza unha folga
Os sindicatos CCOO, UGT e CIG convocan unha concentración do sector do comercio de metal da provincia de Pontevedra. Foi o sábado, 19 de novembro, ás 12 horas, diante do Instituto Feiral de Vigo (IFEVI). Con esta protesta, os traballadores e traballadoras esixiron a actualización do seu convenio, que leva tres anos caducado, e déronlle unha última advertencia ás empresas antes da xornada de folga provincial que tivo lugar hoxe.
As organizacións sindicais lembran que o actual convenio colectivo rematou a súa vixencia no 2019. Desde aquela estase intentando renovar o texto coas patronais ATRA e ACE, sen que a parte empresarial amose vontade negociadora. Ante isto, a parte social incluso pediu a incorporación deste convenio ao do comercio vario, onde xa están outros sectores comerciais, recibindo tamén unha negativa —neste caso, da patronal ATRA.
Ademais dos salarios, onde os sindicatos piden incrementos acordes co encarecemento do custo da vida, estábanse a negociar outras cuestións, como a adaptación ao que esixe a reforma laboral no tocante á contratación, a xornada laboral anual e dereitos sociais como licenzas, días de libre disposición ou vacacións.
CCOO, UGT e CIG sinalan que a parte social cedeu en moitas reivindicacións para tentar chegar a un acordo, incluso aceptando que non houbese incremento salarial retroactivo para os anos 2020 e 2021. Na xuntanza do pasado 11 de outubro, ATRA retirou todas as súas propostas, alegando que parte social pedira «moito» na anterior reunión.
Para os tres sindicatos, este comportamento é contrario ao principio da boa fe que debe presidir todas as negociacións. A ruptura do diálogo non lles deixa aos traballadores e traballadoras outra saída que a mobilización en defensa dos seus dereitos.
CCOO Servizos é segunda forza en Grandes Almacéns!!
O 18 de Novembro celebráronse eleccións sindicais no sector de Grandes Almacéns nas que Servicios CCOO logrou consolidar máis de 400 delegados e delegadas a nivel sectorial, pasando a ser o segundo sindicato no sector.
As eleccións celebráronse en diversas empresas do sector, ECI, Carrefour, Alcampo, Ikea, Conforama, Makro, Ikea, Apple, etc. Grazas ao esforzo de coordinación entre os delegados e delegadas e federacións e o traballo de todos e todas neste último ano, CCOO confirmou o seu crecemento de representación no sector. Con estes resultados confírmase que CCOO recibe un amplo apoio onde presenta candidaturas.
Desde a Federación de Servizos de CCOO felicitamos a todas as persoas que co seu traballo fixeron posible todo isto e damos as grazas a quen se presentou nas nosas candidaturas e aos traballadores e traballadoras a confianza depositada en CCOO. Para CCOO este apoio recibido fortalece o compromiso para facer fronte aos retos que ten o sector de grandes almacéns nos próximos catro anos, apostando pola negociación colectiva, o diálogo e as formulacións e propostas do Sindicato para a negociación do Convenio Colectivo que se negocie.
Asinado o novo convenio provincial da hostalaría da Coruña
A Federación de Servizos de CCOO de Galicia informa do asinamento do convenio colectivo da hostalaría da provincia da Coruña. O sindicato salienta que este convenio permite mellorar os salarios, cunha suba do 11,75 % durante a vixencia do texto. Tamén inclúe melloras para a conciliación da vida familiar e laboral, en materia de formación e tamén no tocante á contratación, coa transformación de contratos a tempo parcial noutros a tempo completo.
O novo convenio ten vixencia ata o 2024 e inclúe unha suba salarial para este ano do 4%, do 3,75% para o 2023 e do 4% no derradeiro ano de vixencia. Para este ano prevese o pagamento de atrasos con carácter retroactivo desde o 1 de xaneiro, que se deberán aboar antes de marzo do 2023. Se o IPC acumulado durante a vixencia do convenio supera o 11,75%, axustarase nas táboas salariais do ano 2025 co 50% da diferenza.
Contratación e condicións laborais
En materia de contratación, os fixos-descontinuos terán un chamamento mínimo de cinco meses, cun preaviso de dez días. Haberá posibilidade de consolidcación do 50% se superan os cinco meses en dous anos. Estas mesmas condicións esténdense aos contratos a tempo parcial, cun mínimo de catro horas de xornada diaria e vinte de semanal.
Asemade, os contratos indefinidos deberán representar, polo menos, o 65% dos rexistrados na empresa.
Dereito á desconexión
As empresas non poderán enviar mensaxes ou correos profesionais fóra do horario laboral agás en casos de urxencia e non poderá haber sancións polo feito de non atender as citadas comunicacións.
Formación
Establécese un complemento de vinte euros mensuais para cada persoa traballadora en empresas que non acrediten impartir formación nas condicións que establece o convenio.
Camareiras de piso e repartidores
Por outra parte, a partir do 1 de abril do vindeiro ano, á categoría de camareiro ou camareira de piso aplicaráselle a regulación establecida no artigo 42.6 do Estatuto dos traballadores —de aplicación para as empresas contratistas e subcontratistas.
Así mesmo, nas empresas onde as persoas traballadoras fagan reparto a domicilio en vehículo, aplicaráselles o convenio de hostalaría da provincia da Coruña.
CCOO saúda que as empresas «movan ficha» para desbloquear o convenio do comercio vario da Coruña e esixe garantir os salarios
A Federación de Servizos de CCOO de Galicia saúda que as empresas «movan ficha» para desbloquear o convenio do comercio vario da provincia da Coruña. O sindicato lembra que nesta actividade traballan máis de 22.000 persoas que dependen do convenio para veren actualizados os seus salarios, algo especialmente importante nun contexto de elevada inflación.
Tras a última reunión, que tivo lugar esta semana, comeza a haber avances nas seguintes materias:
— Incremento da licenza de matrimonio ou parella de feito a 20 días.
— Acompañamento de menores (10 horas anuais).
— Mellora da licenza por falecemento ou enfermidade (un mínimo de 5 días para todos os casos).
— Incluír sábados libres para as chamadas fins de semana de calidade.
— Incremento de cantidades e pagamento da voluntariedade dos domingos en que se traballe.
— Remuneración das tardes dos días 24 e 31 de decembro con 12 euros por hora a partir das 14:00.
— Incremento dos importes dos seguros de invalidez e deceso.
— Incremento de horas asignadas ao persoal contratado a tempo parcial antes das novas contratacións, así como consolidación destas horas.
— Incorporar ao convenio a todo o persoal do sector do moble (máis de mil persoas).
Garantir os salarios
No aspecto salarial, sobre a proposta inicial, propoñen as seguintes cantidades (sen cláusula de revisión conforme ao IPC): 0 % para o 2021, 3,5 % para o 2022, 2,5 % para o 2023 e 2 % para o 2024. CCOO defende que o incremento do 2021 debe ter como referencia o 6,5 % do IPC dese ano; esixe tamén que as empresas aumenten as porcentaxes asignadas para o período 2022-2024 e pide un mecanismo de revisión salarial conforme o IPC para garantir o poder adquisitivo dos salarios.
Segundo CCOO-Servizos, haberá cando menos unha reunión semanal para axilizar a negociación. O sindicato coida que este convenio precisa ser renovado antes de que remate o actual ano 2022, pois «as traballadoras e traballadores do sector non poden pasar un ano máis sen que se actualicen os salarios».
