Asinado o novo convenio provincial da hostalaría da Coruña
A Federación de Servizos de CCOO de Galicia informa do asinamento do convenio colectivo da hostalaría da provincia da Coruña. O sindicato salienta que este convenio permite mellorar os salarios, cunha suba do 11,75 % durante a vixencia do texto. Tamén inclúe melloras para a conciliación da vida familiar e laboral, en materia de formación e tamén no tocante á contratación, coa transformación de contratos a tempo parcial noutros a tempo completo.
O novo convenio ten vixencia ata o 2024 e inclúe unha suba salarial para este ano do 4%, do 3,75% para o 2023 e do 4% no derradeiro ano de vixencia. Para este ano prevese o pagamento de atrasos con carácter retroactivo desde o 1 de xaneiro, que se deberán aboar antes de marzo do 2023. Se o IPC acumulado durante a vixencia do convenio supera o 11,75%, axustarase nas táboas salariais do ano 2025 co 50% da diferenza.
Contratación e condicións laborais
En materia de contratación, os fixos-descontinuos terán un chamamento mínimo de cinco meses, cun preaviso de dez días. Haberá posibilidade de consolidcación do 50% se superan os cinco meses en dous anos. Estas mesmas condicións esténdense aos contratos a tempo parcial, cun mínimo de catro horas de xornada diaria e vinte de semanal.
Asemade, os contratos indefinidos deberán representar, polo menos, o 65% dos rexistrados na empresa.
Dereito á desconexión
As empresas non poderán enviar mensaxes ou correos profesionais fóra do horario laboral agás en casos de urxencia e non poderá haber sancións polo feito de non atender as citadas comunicacións.
Formación
Establécese un complemento de vinte euros mensuais para cada persoa traballadora en empresas que non acrediten impartir formación nas condicións que establece o convenio.
Camareiras de piso e repartidores
Por outra parte, a partir do 1 de abril do vindeiro ano, á categoría de camareiro ou camareira de piso aplicaráselle a regulación establecida no artigo 42.6 do Estatuto dos traballadores —de aplicación para as empresas contratistas e subcontratistas.
Así mesmo, nas empresas onde as persoas traballadoras fagan reparto a domicilio en vehículo, aplicaráselles o convenio de hostalaría da provincia da Coruña.
CALENDARIO LABORAL DE GALICIA 2023
CCOO saúda que as empresas «movan ficha» para desbloquear o convenio do comercio vario da Coruña e esixe garantir os salarios
A Federación de Servizos de CCOO de Galicia saúda que as empresas «movan ficha» para desbloquear o convenio do comercio vario da provincia da Coruña. O sindicato lembra que nesta actividade traballan máis de 22.000 persoas que dependen do convenio para veren actualizados os seus salarios, algo especialmente importante nun contexto de elevada inflación.
Tras a última reunión, que tivo lugar esta semana, comeza a haber avances nas seguintes materias:
— Incremento da licenza de matrimonio ou parella de feito a 20 días.
— Acompañamento de menores (10 horas anuais).
— Mellora da licenza por falecemento ou enfermidade (un mínimo de 5 días para todos os casos).
— Incluír sábados libres para as chamadas fins de semana de calidade.
— Incremento de cantidades e pagamento da voluntariedade dos domingos en que se traballe.
— Remuneración das tardes dos días 24 e 31 de decembro con 12 euros por hora a partir das 14:00.
— Incremento dos importes dos seguros de invalidez e deceso.
— Incremento de horas asignadas ao persoal contratado a tempo parcial antes das novas contratacións, así como consolidación destas horas.
— Incorporar ao convenio a todo o persoal do sector do moble (máis de mil persoas).
Garantir os salarios
No aspecto salarial, sobre a proposta inicial, propoñen as seguintes cantidades (sen cláusula de revisión conforme ao IPC): 0 % para o 2021, 3,5 % para o 2022, 2,5 % para o 2023 e 2 % para o 2024. CCOO defende que o incremento do 2021 debe ter como referencia o 6,5 % do IPC dese ano; esixe tamén que as empresas aumenten as porcentaxes asignadas para o período 2022-2024 e pide un mecanismo de revisión salarial conforme o IPC para garantir o poder adquisitivo dos salarios.
Segundo CCOO-Servizos, haberá cando menos unha reunión semanal para axilizar a negociación. O sindicato coida que este convenio precisa ser renovado antes de que remate o actual ano 2022, pois «as traballadoras e traballadores do sector non poden pasar un ano máis sen que se actualicen os salarios».
CCOO consegue en CTAG unha mellora salarial do 6,3 %, acordo de teletraballo e flexibilidade horaria
CCOO CTAG foi o único sindicato que introduciu a variable económica como imprescindible para asinar o conxunto de acordos de teletraballo e flexibilidade. Hai un mes xa se daba por «pechada a negociación» que, ao cabo, se consegue manter viva para completar con medidas que foran descartadas inicialmente pola dirección. Ler máis
CCOO Servizos sae ás rúas de Madrid para pedir subas salariais e o desbloqueo da negociación colectiva
Milleiros de traballadoras e traballadores, de delegados e delegadas sindicais, procedentes de todos os recunchos do país participaron nas marchas a Madrid convocadas por CCOO e UGT, para protestar contra a actitude irresponsable e egoísta de CEOE e CEPYME que están a apostar pola conxelación dos salarios, ante o aumento desbocado dos prezos.
Como denunciou o secretario xeral de CCOO, Unai Sordo, «as organizacións empresariais están demasiado afeitas a saír da crise sempre pola vía da desvalorización dos salarios, a destrución de emprego e das condicións de vida da maioría social».
Tres marchas e unha gran concentración
Desde primeiras horas da mañá, e desafiando á choiva, a multitudinaria participación nas marchas, que foron avanzando en tres columnas desde Atocha, Praza de España e Porta de Toledo, ata a Praza Maior, colapsou as céntricas rúas da capital que se viron asolagadas por miles de manifestantes, os petos vermellos e as bandeiras de cada organización, que poñían a nota multicolor a unha nova xornada de protesta baixo o lema “Salario ou conflito”.
Unha gran mobilización que reflicte a indignación e rebeldía da clase traballadora ante a cicatería dunha patronal que só pensa en salvagardar os seus beneficios, trasladando o incremento dos prezos á cesta da compra, e á conta de conxelar os salarios, xerando situacións de desigualdade e pobreza.
Neste sentido, os manifestantes xa advertiron que «ante a negativa da patronal ás propostas sindicais, a nosa resposta seguirá sendo a loita e a mobilización ata que senten a negociar o incremento dos salarios». Ler máis
