Archivado en

polo traballo decente e contra a directiva europea das 65 horas

Máis de 15 mil persoas acoden ao chamamento de CCOO e UGT


Máis de 15 mil persoas chegadas de toda Galicia participaron na manifestación convocada por UGT-Galicia e o Sindicato Nacional de CCOO. A mobilización, que arrincou ás 20 horas en Vigo do cruzamento da Vía Norte con Urzáiz e rematou na rúa de Montero Ríos, foi o acto central da Xornada Mundial polo Traballo Decente, na que ademais de reclamar un traballo con dereitos para toda a clase traballadora, tamén se protestou contra a directiva europea das 65 horas.


pdf
print
pmail


Esta Xornada é unha mobilización de alcance internacional convocada pola Confederación Sindical Internacional (CSI) e todas as súas organizacións asociadas que, no caso de Europa, se concentran na Confederación Europea de Sindicatos (CES), da cal fan parte CCOO e UGT.  
 
Segundo os secretarios xerais de UGT e CCOO de Galicia, José Antonio Gómez e Xan María Castro, a de hoxe foi «unha data histórica», xa que a Xornada Mundial polo Traballo Decente é «a primeira mobilización global, o primeiro acto coordinado internacionalmente e co obxectivo principal de reclamar unhas condicións de traballo dignas para os traballadores e traballadoras de todo o mundo».  
 
Obxectivos do Milenio 
 
Ademais do traballo decente, a convocatoria internacional da Xornada tamén pediu o cumprimento dos Obxectivos do Milenio das Nacións Unidas, que para a ONU deben estar cumpridos como moi tarde en 2015. Trátase de erradicar a pobreza extrema e a fame, lograr o ensino primario universal, promover a igualdade de xéneros, reducir a mortaldade infantil, mellorar a saúde materna, combater as enfermidades endémicas —como a sida ou o paludismo—, garantir a sustentabilidade do medio natural e fomentar unha asociación mundial para o desenvolvemento.  
 
Directiva europea 
 
Á parte das reivindicacións xenéricas para todo o mundo, a Xornada Mundial polo Traballo Decente en Europa, como no caso de Galicia, acompañouse tamén doutra esixencia: a loita contra a directiva europea de tempo de traballo, que permite unha semana laboral máxima de 65 horas. Para os dirixentes de CC OO e de UGT de Galicia trátase dunha «profunda regresión das conquistas sociais que historicamente lograron as traballadoras e traballadores organizados en sindicatos».  
 
José Antonio Gómez e Xan María Castro tamén consideran que a dita directiva atenta contra a negociación colectiva, xa que propugna a individualización das condicións de traballo. Na súa opinión, isto «só favorecerá a competencia desleal» e «acabará por xerar dúmping no proceso de construción europea».