CCOO intensifica as accións para reverter a deslocalización da atención telefónica que Naturgy presta desde Galicia
A Federación de Servizos de CCOO intensifica as accións para reverter a deslocalización da atención telefónica que Naturgy presta desde Galicia. Por motivos puramente económicos, a compañía eléctrica quere trasladar a Colombia a maior parte do servizo de atención telefónica da súa filial Unión Fenosa Distribución (UDF) do que se encarga Teleperformance. Das 118 persoas que se ocupan deste labor, o 80 % deixarano de facer a partir de setembro debido á deslocalización. Só continuarán aproximadamente dúas ducias, insuficientes para prestar un servizo de calidade e reducindo a atención en galego «á mínima expresión», denuncian desde CCOO, ao tempo que reprochan a ausencia de compromisos de recolocación.
A Federación de Servizos de CCOO promoveu nas últimas semanas diferentes accións contra a decisión de Naturgy, sendo unha das máis importantes a concentración do pasado venres, 12 de agosto, na Coruña. Ao mesmo tempo, o persoal fixo paros nas quendas de mañá, tarde e noite.
Paralelamente á presión na rúa, desde CCOO mantense aberta a vía institucional. Neste sentido, membros do sindicato xa se reuniron nas últimas datas con distintos grupos da corporación municipal, así como con representantes galegos nas Cortes estatais, co obxectivo de tentar reverter a decisión de Naturgy. En concreto, houbo reunións o 3 de agosto co grupo municipal da Marea Atlántica, o día 8 co do PP, o día 9 con Esquerda Unida e Podemos e o 16 con representantes de Unidas Podemos no Congreso e coa concelleira de Podemos na Coruña. Ler máis
Seguimento case total da folga de Bosch Vigo para rexeitar o ERE
Este luns secundaron a folga case todas as traballadoras e traballadores de Bosch Service Solutions, a segunda empresa máis grande de Vigo por volume de persoal. No principal servizo afectado, o seguimento foi do 99% durante a quenda da mañá. Ademais do paro, houbo tamén concentración diante das instalacións da compañía para rexeitar as condicións do novo ERE que presentou hai poucos días a dirección.
Bosch Service Solutions dedícase ao sector de centros de chamadas e presta servizos para clientes como Repsol, Orange, Iberdrola e a mencionada Vodafone, entre outras compañías. Desde o inicio da pandemia, Bosch encadeou varios ERTE e ERE, así como modificacións substanciais de condicións de traballo que afectaron principalmente aos servizos que se prestan para Vodafone.
A mediados de xuño, a dirección da empresa convocou o comité para iniciar un período de negociación dun novo ERE pola perda do servizo de Vodafone HD, que se deslocaliza a outros países.
CCOO rexeita o desmantelamento da empresa, tanto por parte de Bosch como pola deslocalización promovida por Vodafone, que provocaron que o cadro de persoal en Vigo pasara de 2500 persoas hai menos de catro anos a 1400 na actualidade.
Reunión coa directora xeral de Relacións Laborais da Xunta
Reunión da Secretaria Xeral de CCOO Servizos Galicia, Lucía Trenor e a delegada da sección sindical CCOO de Bosch Service Solutions en Vigo, Juana Taboada con Elena Mancha directora xeral de Relacións Laborais da Xunta e Marta Mariño Regueiro, xefa territorial da Xunta en Pontevedra no marco dos contactos que se están mantendo coa Xunta de Galicia onde se está abordando a problemática existente en sectores coma o Contact Center.
Reunión coa conselleira de Promoción de Emprego e Igualdade
A secretaria xeral da Federación de Servizos de CCOO, Lucía Trenor e o responsable de Servizos Técnicos, Iván Cordeiro, mantiveron hoxe unha reunión coa conselleira de Promoción de Emprego e Igualdade, Mª Jesús Lorenzana e a directora xeral de Relacións Laborais, Elena Mancha para tratar a situación dos sectores de Centros de Chamadas, TICS, Enxeñerías e Servizos de Prevención. Ademais solicitouse a revisión dos pregos de contratación e a verificación de que se respecta a lexislación laboral e as condicións de traballo dos sectores.
Os cadros de persoal estanse vendo empobrecidos pola negativa das súas patronais a realizar unha subida salarial nun contexto de inflación desorbitada. O volume de negocio que prestan estas empresas viuse incrementado durante o tempo de pandemia, e por tanto, tamén o seu nivel de facturación. Ademais, estas patronais coinciden en que non poden repercutir as subidas salariais ás súas empresas clientes, referíndose en numerosos casos á propia Administración Pública.
Escalada de tensión na mesa do convenio de centros de chamadas: CCOO chama á folga
Celebrouse hoxe, 13 de xuño, a segunda xornada de folga de 24 horas tralo éxito da do pasado 13 de mario.Na última reunión da mesa negociadora do convenio, CCOO e UGT demandaron un xiro na negociación. Malia que a próxima reunión está fixada para o 28 de xuño, só se reunirán cando as empresas presenten unha proposta conforme as necesidades do persoal.
A Federación de Servizos de CCOO de Galicia destaca o gran seguimento no comezo da folga de 24 horas convocada para este luns no sector de centros de chamadas (contact center), así como na manifestación principal, que tivo lugar en Vigo.
A posición respecto ao necesario incremento salarial no sector que defende CCOO vai calando nas empresas xa que catro delas: Abai, Intrum, Concentrix, Lananden, Jazzplat, Oest e Telecyl xa están a aplicar ou van aplicar subidas salariais en 2022 que posteriormente se axustarán ao que se pacte no Convenio.
Desde o sindicato celébrase a entrada en razón das devanditas empresas xa que é de xustiza unha revisión salarial para as persoas traballadoras do sector, que perciben unha media de ingresos brutos mensuais de 800€ que non se actualizan desde 2019, co IPC desde hai case dous anos desbocado.
Ademais, hai outros problemas que debemos resolver neste Convenio:
- Débennos diñeiro desde marzo de 2020.Regulación e compensación do teletraballo
- Xornadas parciais indesexadas que nos condenan non só a baixos salarios, senón a unhas cotizacións paupérrimas de cara ao noso futuro, por non falar das ampliacións temporais de xornada que nunca consolidan.
- Abuso da contratación de ETT, compañeiros e compañeiras a quen as empresas consideran "de segunda".
- Os continuos Es e ERTEs no sector, polo encabezonamiento da patronal en non querer incluír a subrogación como unha medida de estabilidade no emprego.
Centros de Chamadas: Hoxe folga estatal para desbloquear o convenio
O persoal do sector dos centros de chamadas está convocado hoxe a unha folga de 24 horas a nivel estatal por CCOO e UGT. O motivo é o bloqueo das negociacións do convenio por mor a actitude obstrucionista da patronal, pois non houbo avances nas negociacións nos últimos dous anos e medio.
A Federación de Servizos de CCOO denuncia que ao persoal do sector se lle conxela o soldo desde o ano 2019. É un persoal moi profesional e que non percibe ningunha compensación de gastos por teletraballar. Ademais, en moitas perciben o SMI, polo que padece de xeito especial o impacto da inflación.
As traballadoras e traballadores dos centros de chamadas son as persoas que están do outro lado do teléfono cando a cidadanía pide asistencia en sectores tan importantes como a banca, a enerxía, a sanidade ou as telecomunicacións e operan para empresas como Santander, Abanca, Inditex, Orange, R Cable, Vodafone, Natural, Iberdrola, Endesa, etc.
CCOO realizou unha manifestación o propio 13 de maio que partiu ás 11:30 do Obelisco da Coruña e rematou na praza de Mina.
Concentracións nas sedes das grandes empresas clientes de Contact Center
Ante a imposibilidade de negociación coa patronal do sector de Contact Center, CEX, e as actuais circunstancias que precarizan cada vez máis o persoal, ás organizacións sindicais non queda máis camiño que o de elevar o ton da protesta para dignificar estas condicións de traballo.
O 22 de febreiro comezaron as mobilizacións convocadas por CCOO e UGT con asistencia masiva por parte do persoal cuxa situación é límite ante o devir dos acontecementos. Estase a reclamar unha maior presión cara ás empresas para saír da precariedade na que están estancadas: baixos salarios, abusos das xornadas parciais, dificultade para conciliar, riscos psicosociais polos elevados niveis de esixencia dos servizos, etc.
Un dos graves problemas aos que se enfronta as traballadoras de Contact Center é que as subidas de prezos de produtos de consumo (IPC) non se está vendo reflectida en actualización salarial algunha o que esta provocando un empobrecimiento sistemático destas traballadoras. Tampouco se está cumprindo coa lei vixente no sector xa que non se está respectando a Lei de Teletraballo, de tal modo que as empresas seguen utilizando esta modalidade sen regulación e sen recoñecer o dereito a percibir unha compensación polos gastos xerados. E non se está respectando a lexislación sobre transparencia e igualdade retributiva e as empresas do sector continúan sen realizar auditorías.
Desde CCOO advírtese á patronal de que a escalada de tensión neste conflito non vai cesar ata que sente a negociar e adquira unha posición de respecto e de compromiso ante un persoal que xa non pode aguantar máis.
As traballadoras e traballadores dos centros de chamadas maniféstanse na Coruña en defensa do seu convenio
A Federación de Servizos de CCOO de Galicia informa de que as traballadoras e traballadores dos centros de chamadas (contact center) se manifestarán na Coruña o venres en defensa do seu convenio colectivo. Segundo o sindicato, as negociacións están bloqueadas por mor da actitude da patronal. A mobilización partirá do Obelisco e rematará na praza de Mina, pasando o seu percorrido por diante das principais empresas do sector e dos seus grandes clientes.
Deste xeito, a marcha transitará por diante das instalacións de centros de chamadas como Teleperformance, Konecta, Gestión C, Prosegur Avos ou DXC Techonology, así como das oficinas de Abanca, Santander, BBVA, Caixabank ou R Cable, principais destinatarias en Galicia dos seus servizos. Ler máis
CCOO informa dun novo impagamento de nóminas en Abante BPO Lugo e presenta unha denuncia na Inspección de Traballo
A Federación de Servizos de CCOO de Galicia denuncia que continúan os incumprimentos de Abante BPO Lugo no que respecta ao pagamento dos salarios. Segundo o sindicato, a día de hoxe a empresa aínda non pagou a extra de decembro nin tampouco a nómina ordinaria do mes de febreiro. CCOO amosa a súa preocupación polo rumbo de Abante ante a «nefasta xestión» da súa dirección, o que lle valeu ata o momento dúas denuncias na Inspección de Traballo.
Desde que os actuais xestores se fixeron cargo de Abante, o comité só conseguiu reunirse en dúas ocasións coa dirección. A primeira, o pasado 13 de decembro, cando se anunciou a compra. A segunda, o 3 de febreiro, cando a dirección informou de que estaba a facer as xestións oportunas para poder pagar a extra de decembro, non aboada «por problemas de liquidez».
Constatado tamén o atraso no pagamento da mensualidade de febreiro, a sección sindical de CCOO tentou poñerse en contacto coa empresa en reiteradas ocasións para instala a reunirse co comité. A resposta foi que se estaban a facer «esforzos» para o pagamento e declinando convocar xuntanza ningunha.
Ante esta situación, CCOO presentou unha nova denuncia na Inspección de Traballo, que se suma á interposta xa o pasado mes de decembro.
A patronal de Contact Center resístese a aplicar a Reforma Laboral
O 21 de febreiro levouse a cabo unha asemblea de delegados/as do sector de Contact Center de Galicia na que interviron a secretaría xeral da Federación de Servizos de Galicia, Lucía Trenor, o secretario de acción sindical Juan Zas, o responsable do sector de Contacr Center en Galicia Xosé González, e o responsable de Servizos Técnicos Iván Cordeiro.
Nas intervencións expuxéronse ante os participantes, delegados e delegadas do sector en todas as provincias da comunidade autónoma, temas de total actualidade no sector, tales como:
- Situación da negociación colectiva no Contact Center.
- Calendario de mobilizacións para defender a plataforma sindical.
- Importancia do labor da Representación Legal das Persoas Traballadoras RLPT nas empresas.
- Afectación dos últimos decretos do Goberno: Reforma Laboral; Plans de Igualdade e Auditoría Salarial; Salario Mínimo Interprofesional.
CCOO denuncia a falta de pagamento de nóminas en Abante BPO
CC.OO denuncia a falta de pagamento da nómina extraordinaria de decembro na empresa ABANTE BPO LUGO tras o cambio de propietarios anunciado en decembro.
Desde o pasado 13 de decembro de 2021, despois de que o Comité de Empresa se reunise coa nova dirección, non se tiveron máis noticias por parte de ABANTE BPO LUGO. A Sección Sindical de CCOO tentou en numerosas ocasións pórse en contacto coa empresa para obter máis información sobre a súa situación real, non obtendo ningunha resposta.
Ante o incumprimento do abono da paga extra e a falta de noticias, a Sección Sindical de CCOO procedeu a pór unha denuncia ante Inspección de traballo reclamando que se obrigue á empresa a facer fronte ás súas obrigas de pago. CCOO considera que a falta de pagamento da paga extra de decembro supón un grave prexuízo para o persoal nunhas datas tan sinaladas como o nadal e nun sector onde se cobra a xornada completa apenas 1000 euros mensuais.
A Federación de Servizos de CCOO en Galicia ve con preocupación a situación que atravesa ABANTE BPO, empresa do sector de Contact Center que chegou a dar traballo na provincia de Lugo a máis de 450 persoas e que a día de hoxe conta con escasas 100 persoas empregadas.