Esta vez son 16 os traballadores despedidos tras perder o servizo que a empresa de multiservicios Adecco Outsourcing ten contratado con GEFCO España no centro denominado CTL3 en Mos e que se basea no almacenamento e preparación de pedidos para PSA-Peugeot-Citroen.
Na Federación de Servizos de CCOO non entendemos que se sigan producindo situacións deste tipo que non teñen ningunha explicación lóxica e razoable. Tras conseguir unha mellora das condicións laborais e salariais coa firma de varios acordos con Adecco Outsorcing, atopámonos con que a decisión que toma a empresa principal é rescindir o contrato para, imaxinamos, cambiar a estes traballadores por outros con peores condicións. Non entendemos que un servizo que estaba a funcionar perfectamente, de súpeto e sen motivo aparente, deixe de ser interesante para GEFCO España.
Desde CCOO estamos a facer un esforzo importante para conseguir mellorar ás paupérrimas condicións de traballo que están a sufrir os traballadores e traballadoras das empresas Multiservizos. Por iso non podemos deixar de denunciar actos como este, no que, baseado en non se sabe que tipo de intereses e utilizando armas legais que a reforma laboral puxo ao alcance das empresas, decídese despedir a uns traballadores que a través da negociación colectiva conseguiran unha pequena mellora das súas condicións de traballo, para sen dúbida ningunha pór no seu lugar a outros en peores condicións.
