CCOO-Servizos congratúlase de que Vigo non aumente a zona de afluencia turística e critica que A Coruña a amplíe
CCOO-Servizos congratúlase de que Vigo non aumente a zona de afluencia turística, que permite a apertura todos os días do ano nos establecementos con máis de 300 metros cadrados de superficie. Porén, o sindicato critica que A Coruña non atendese o informe do sindicato e decidise ampliar a súa zona. Ler máis
CCOO rexeita a ampliación da zona de afluencia turística da Coruña, que se estende a Monte Alto e Distrito Picasso
A Federación de Servizos de CCOO rexeita a ampliación da zona de afluencia turística da Coruña, que agora se estende ata Monte Alto de Distrito Picasso. Nestas zonas, os establecementos comerciais con máis de 300 metros cadrados de superficie poden abrir todo o ano.
Para CCOO-Servizos, este tipo de medidas só benefician as grandes empresas de distribución en detrimento do pequeno e mediano comercio, rompendo o equilibrio entre uns e outros.
Segundo o sindicato, está demostrado que a ampliación de horarios e a apertura en todos os festivos do ano non anima o consumo nin crea máis emprego. Pola contra, supón maior carga de traballo e empeoramento das condicións laborais, dificultando tamén a conciliación.
Por esta razón, CCOO presentou un informe desfavorable á dita ampliación que, non obstante, foi obviada polo Goberno local, que no pleno desta semana aprobou a medida só co apoio do PP.
Ata agora, a zona de afluencia turística coruñesa abranguía o centro da cidade, Riazor e a contorna da Torre de Hércules. Agora esténdese ata Monte Alto e Distrito Picasso.
O pleno do Concello de Vigo mantén a área de afluencia turística pactada hai cinco anos
Este 2022 era ano de revisar as áreas de afluencia turística, nas que os establecementos de máis de 300 metros cadrados poderán abrir todo o ano.
No caso de Vigo, CCOO propúxolle ao Concello manter a mesma zona que se aprobara hai cinco anos, ao entender que non hai motivos que xustifiquen facer ningún tipo de ampliación. Malia que no período de negociación houbo movementos para tentar ampliar esta zona, a insistencia e consistencia coa que o sindicato defendeu a súa postura, xunto coa doutras organizacións que estaban na mesma liña, fixo que o Goberno local optase por non facer cambios.
Esta zona abrangue o que se podería definir como o núcleo histórico vigués, incluíndo a zona de Bouzas e o ámbito perimetral entre as rúas San Francisco, Poboadores, Falperra, Cachamuíña, Paseo de Granada, II República, Porta do Sol, Policarpo Sanz, García Barbón, Pontevedra, Areal, Montero Ríos e Cánovas del Castillo (excluíndo a zona a carón do mar) ata San Francisco.
Un ano máis, as zonas que se potencian como de afluencia turística son aquelas que contan con pequeno comercio e de proximidade, quedando excluídas as grandes áreas comerciais.
CCOO considera moi positiva esta medida, aprobada no pleno municipal do 28 de xuño co consenso de todas as partes implicadas.
Asinado preacordo do convenio de comercio alimentación da Coruña, con aumento salarial e redución de xornada
A Federación de Servizos de CCOO informa do asinamento, o mércores, do preacordo que pon fin ao conflito no sector do comercio de alimentación da provincia da Coruña. O convenio, cunha vixencia do 2022 ao 2025, recollerá importantes subas salariais —con revisión ligada ao IPC real— e redución da xornada laboral anual, entre outras importantes melloras de condicións. O texto tamén recolle cláusulas ligadas á desconexión dixital e á transición dixital, aspectos que cobran cada vez máis importancia.
En materia salarial, o preacordo recolle aumentos do 5 % para o presente ano 2022, do 4 % no 2023 e do 3 % para o 2024 e o 2025. Así mesmo, páctase unha revisión salarial conforme ao IPC real, cun tope do 2,5 % para este ano, do 2 % no 2023 e do 1 % nos dous últimos anos de vixencia do convenio.
Tamén se incorpora na redacción unha cláusula de rexistro de valores, para garantir a igualdade de salarios e complementos, co obxectivo de combater a fenda salarial.
A xornada anual redúcese en vinte horas, de 1812 a 1792. Isto faise mediante a aplicación de tres fins de semana de calidade, gozando un sábado libre cada cuadrimestre —excepto no mes de decembro—. Tamén se acorda fomentar a xornada continua, como mínimo para o 70 % do persoal da tempo completo por tenda.
Tamén se mellora o sistema de clasificación profesional, eliminando o grupo IV e cun grupo III con catro niveis e promoción automática de nivel cada tres anos, respectando antigüidades e experiencia acreditada.
Outras cláusulas que se asinan teñen a ver co aspecto dixital. Por unha banda, a de desconexión, para evitar continuas chamadas de teléfono ou mensaxes ao saír do centro de traballo. Pola outra, a transición dixital, para regular a afectación da dixitalización e da venda online, para evitar a perda de postos de traballo.
Finalmente, actualízase o contido en materia de xestación conforme a lexislación vixente e mellora a licenza retribuída no suposto de hospitalización, que é de catro días e poderase iniciar en calquera dos días que esta dure —e mesmo se poderá usar de maneira fraccionada.
Nova reunión do convenio comercio alimentación de A Coruña
Nesta última reunión tratáronse os seguintes puntos:
Eliminación do grupo IV: A patronal propón un grupo 3 con 4 niveis, pero seguen querendo que a promoción, polo menos no primeiro nivel, sexa aos 4 anos.
CCOO non lle dá máis voltas, o período de promoción non pode superar o tres anos, como até agora.
Redución da xornada laboral. De 1812 horas anuais a 1798 horas anuais en dous anos e 2 fins de semana de calidade, un iniciaríase no 2023 e dous a partir de 2024.
CCOO expuxo que a xornada anual ten que baixar como mínimo a 1790 horas, que se podería facer con tres fins de semana de calidade libres, uns cada cuadrimestre.
Xornada Continua. Parece que por fin a patronal entende que hai un problema, pero presentan unha proposta tan aberta e con tantas condicións, QUE É INASUMIBLE.
CCOO lembra unha vez máis que a xornada partida penaliza o gasto de acudir ao centro de traballo e agora máis coa subida do combustible, que ademais xa se fai ou se fixo en pandemia e que non regular a xornada para evitar quendas partidas, só obedece a un capricho e a querer castigar ao persoal.
Incremento salarial: Mantén a proposta anterior de Incremento Salarial: 2022 - 2´75% 2023 - 2´5 % 2024 - 2´25% 2025 - 2´25% 2026 - 2 % 2027 - 2%
O IPC continúa subindo e parece que a patronal non entende os problemas do persoal para asumir os gastos que esta inflación disparada está a ter na súa economía. Mentres eles soben os prezos para manter os beneficios, NÓS/AS pagamos máis polos artigos co salario conxelado.
CCOO expuxo alto e claro que chegou a hora de que a patronal se implique na solución desta crise, que pense nas persoas traballadoras e presente unha subida de salarios digna, é o momento de pensar no persoal e se é á conta de recortar un pouco os seus beneficios, TEN QUE SER.